WILLEMSTAD – Studiantenan ku no por bai studia den Regio pasobra SSC no tin sèn , a mustra interes pa bai studia na Hulanda, komo asina yamá ‘free mover’. Jealaine Alexander, di My Future Career ku ta guia freemoversnan pa Hulanda, a risibi kaba vários petishon pa guia studiantenan ku awor ke bai Hulanda, en bes di Regio.
Sinembargo pa My Future Career ta inkomprendibel ku Fundashon pa Finansiamentu di Estudio (SSC ) no tin sèn pa finansiá ningun studiante ku ke bai studia den Regio. “Mi tin sospecho ku ta trata aki di mal maneho di parti di SSC. Pasobra ora ku bo traha bo presupuesto bo mester tene kuenta ku e studiantenan ku ta aktualmente den Regio i esnan nobo. Den kaso ku no tin sufisiente fondo pa manda tur studiante ku ta interesá den Regio, por a adaptá e kantidat”, segun Jealaine Alexander. “Esaki mester ta posibel, basá riba e maneho di gobièrnu.”
Supsidio
Algun dia pasá SSC a partisipá ku e no ta duna finansiamentu di estudio pa studiantenan ku ke bai studia den region e aña aki. Na komienso di e aña aki SSC a anunsiá kaba ku e redukshon di su supsidio ku 4 mion, ta pone ku e fundashon lo no por kumpli ku e petishonnan pa finansiamentu den region.
E oumento bek di 1.5 mion florin, despues ku SSC a hala atenshon di gobièrnu riba e konsekuenshanan, tòg, segun SSC no ta sufisiente pa kumpli ku e petishon di aproksimadamente 240 studiante ku a yena un aplikashon pa risibí finansiamentu pa studia den region.Ta p’esei SSC ta obligá na ninga tur e petishonnan aki.
My Future Career ta insisti: “No por ta asina ku tur sèn di SSC a kaba. For di aña pasá a entrega e presupuesto pa e studiantenan aktual i tambe e studiantenan. Si no tin sèn pa manda tur studiante interesá den Regio, SSC mester por ahustá e kriterionan i manda ménos studiante den Regio.”
Mientrastantu SSC a rekomendá e studiantenan pa skohe un otro país di estudio, esta Hulanda òf na Kòrsou mes. Segun SSC el a alertá e studiantenan for di komienso di aña ku si e supsidio no subi, esaki lo tabata e konsekuensia.
No tin klaridat
My Future Career sinembargo tin indikashon ku e komunikashon ku e studiantenan no ta funshoná optimal. Antisipando riba partisipashonnan ofishal di SSC, tin studiante ku a aserka My Future Career, pa guia nan den e proseso pa bai studia na Hulanda. My Future Career ta lamentá ku ainda no tin klaridat tampoko kiko ta bai pasa ku e studiantenan ku ta den Regio aktualmente.
Jealaine Alexander ta enfatisá ku no tur bia e kambiamentu di ëstudio ta bai fásil. Entre otro tin studiante ku kier a bai studia medisina den Regio. Pa studia medisina na Hulanda, mester inskribí pa partisipá na e asina yamá ‘loting’. E ‘loting’ aki a sera kaba for di yanüari último.
E aña aki e ‘freemovers’ ku ta bai Hulanda ku guia di My Future Career ta biaha den dos grupo; riba dianan 13 i 30 juli. E hóbennan ta bai studia den siudatnan rònt Hulanda.