Portrèt: Kolekshon di Stanley Brown

WILLEMSTAD – Hóbennan ku ta kaba skol, no sa práktikamente nada di nos historia lokal. Un dje aspektonan di nos historia ku ta deskonosí pa hóbennan, ta e ‘lantamentu’ di 30 di mei 1969. Guiá pa sektor sindikal, 48 aña pasá, obreronan su lucha pa logra benefisio igual a kulminá den un disturbio grandi, kaminda hasta mortonan a kai. Pero 30 di mei tabatin konsekuensha positivo tambe. Lamentablemente ningun dje informashon aki, e hóbennan no ta disponé sufisiente di dje.

Frank Quirindongo, ta dosente di Sosiologia i presidente di Plataforma Sklabitut i Herensia di Sklabitut (PSHS). E ta splika den kombersashon ku Dulce Koopman ku e sistema defisiente di nos enseñansa ta motibu dje falta di konosementu i interes serka hubentut:

Frank Quirindongo den kombersashon ku Dulce Koopman

Frank Quirindongo

Quirindongo ta konvensí ku si duna e historia aki na un manera atraktivo , e por logra ku e hóben ta realisá kiko 30 di mei a nifiká pa Kòrsou òf pa nos proseso di emansipashon.
PSHS tin hopi aña ta urgi gobièrnunan di turno pa introdusí un kuríkulo mas adaptá ku ta reorientá riba nos propio asuntunan sosial, polítiko-ekonómiko. ‘Aworakí enseñansa ta deskonektá ku nos realidat’. Segun Quirindongo, gobièrnu no por sigui permití su mes ku muchanan ta kaba skol ku 18 of 19 aña, sin sa nada di nan propio historia. E hóben ku mañan ta e mayor ku mester karga e komunidat, no por hasié debidamente pasobra e konosementu no tei.

Kambio
Riba e pregunta si ainda por trese kambio den e situashon aki Quirondongo ta bisa: “Sigur. Plataforma di Skalibitut i Herensia di Sklabitut mes ta traha riba konsientisashon di nos hendenan i no di hóbennan so, pero hende grandi tambe. Den e kuadro aki tur aña PSHS ta konmemorá diferente fecha históriko, entre nan abolishon di sklabitut.

Mester enfatisá tambe e otro aspektonan ku a surgi despues di 30 di mei. Por ehèmpel a surgi mas apresio pa kultura di Kòrsou . Entre otro pa nos propio idioma, segun Quirindongo.

Dhamelyz Lichtenberg (man robes)

30 di mei por fungi komo ehèmpel kon pa krea liderasgo i bringa pa bo derechonan. Dhamelyz Lichtenberg, studiante di LOFO na Universidat di Kòrsou i Officier Brigadier 3e klasse di Brigada di Seguridat, a haña informashon di 30 mei, serka Brigada di Seguridat. E ta haña hopi importante, ku el a haña e oportunidat pa risibí e informashon aki.

Mas atenshon
Ningun momentu durante di su karera na skol, e no a haña e informashon aki. “E ta siña bo di liderasgo i kon pa bringa pa derechonan”. Dhamelyz , komo futuro maestro di skol, ta spera ku ta bai dediká mas atenshon na Kòrsou, den kuríkulo na skol.