Portrèt: OLB

KRALENDIJK – Aruba tabata remarkablemente ousente na e konferensha di Caribbean Ombudsman Association (CAROA), ku a tuma lugá e siman aki na Boneiru. Asina presidente Nilda Arduin, defensor di pueblo di Sint Maarten i Ombudsman Nashonal Reinier van Zutphen ta bisa. Van Zutphen komo ombudsman di BES tambe ta miembro di CAROA i e biaha aki tabata anfitrion di e konferensha di kada dos aña.

Mayoria di e paisnan karibense tin un defensor di pueblo kaba, mas o ménos 25 di nan. Diesnuebe ta miembro di CAROA. Arduin: “Dos aña pasá nos a bai Aruba ku Reinier van Zutphen i Keursly Concinsion (defensor di pueblo di Kòrsou, red.) pa kombersashonnan ku stakeholders. Parlamento a vota riba esaki i a nombra un organisadó. Pero lastimamente e deadline di promé di yüli lo no ta alkansabel.”

Nilda Arduin. Pòrtrèt: OLB

Van Zutphen ta agregá ku e ta tende ku ta sinti falta di un defensor di pueblo na Aruba: Tin grupo tené atras ku ta sinti falta di un defensor di pueblo kaminda nan por manda un keho. E echo ku gobièrnu no ke esaki kisas ta sintomátiko. Pa siudadano ta masha importante, pasobra tin algun asuntu masha serio ta sosodé. Aruba mester ‘come across’.” Van Zutphen ta teme ku lo posponé e nombramentu di e defensor di pueblo atrobe pa motibu di e elekshon binidero na Aruba, : E ora ei tin otro prioridat atrobe.”

Arduin ta e promé defensor di pueblo di Sint Maarten. A nombr’é riba 10 di òktober di 2010, dia Sint Maarten a bira un pais outónomo. Den e promé añanan el a hasi hopi trabou di pionero, pero ainda esaki no ta kla. “Ta un reto pa lanta un instituto nobo. Nos a traha un plan stratégiko pa dies aña. Eiden nos a inkorporá ku despues di shete aña lo tene un mega-evaluashon. Esaki ta tumando lugá aktualmente.”

Gezaghebber Edison Rijna ta habri e konferensha di Caroa. Potrèt OLB

E opstákulonan di mas grandi aktualmente a solushoná, Arduin ta bisa, manera kon ta finansá defensor di pueblo. Ainda na Sint Maarten nan no konosé e instituto bon ainda. “Ma ta kiko un defensor di pueblo ta hasi? E término gobernashon drechi, na ingles propriety, ainda no ta un término komun. Esei ta indiká kiko e opstákulonan ta ta.”

Arduin ta baha na òktober. Su susesor lo mester kontinuá su trabou. Den buskamentu di un hòmber òf muhé nobo ta falta un bon deskripshon di e funshon. “Nos legislashon mester di un bon profil pa e mandatario. Ken mester haña e trabou?”