DEN HAAG – Ku oumentu di e tenshon na Venezuela e preshon riba e komunidatnan na i islanan di Antia tambe ta subi. Awe riba e promé dia di IPKO (Deliberashonnan Interparlamentario di Reino) na Hulanda tambe tenshonnan a oumentá, espesialmente relatá na e papel ku Reino ta hunga den e problemasia di refugiado for di Venezuela.
Segun Menki Rojer (Kòrsou) diariamente tin 70 pa 100 venesolano ta yega Kòrsou i entretantu tin mas ku 5000 ku ta kedando ilegalmente na Kòrsou. Ana Maria Pauletta (Kòrsou): “Nos ta papia di un fluho di migrante pa un isla chikí.”
Pa kada refugiado ku gara, segun e tin shete ku sí ta yega tera. Kòrsou asina no por hèndel e oumento di kriminalidat pa motibu di kontrabanda di droga i arma mas, e ta bisa. Giselle McWilliam (Kòrsou) ta haña ku Hulanda mester ta pará kla militarmente i polítikamente. Segun Rojer Hulanda mester yuda e islanan. Niun di nan no ta bisa kon.
Responsabel
André Bosman (Hulanda) ta haña esaki muchu fásil bisá. “Si tur hende ta responsabel, niun hende no ta responsabel” e ta bisa e delegashonnan karibense. E ke pa e paisnan karibense tuma nan propio responsabilidat pa despues wak unda Reino mester yuda i di ki manera.
Despues Pauletta ku Bosman ta pega. E ta haña e miembro di VVD ta bagatelisá i ta ridikulisá e input di e islanan i e manera ku nan ta pinta e problema. Bosman ta haña ku nan ta ignor’é personalmente (no den mikrófono) i ta ripití ku e islanan mester bira mas konkreto. Antje Diertens (Hulanda) ta haña ku tur delegashon mester papia pa pensa solushon.
Legislashon di asilo
Miembro di Eerste Kamer Frank van Kappen (VVD) ta intervení. Reino ta responsabel pa Defensa, pero mantenshon di derecho humano, maneho di asilo i deportashon ta asuntu di e pais. “T’asina e kos ta. pero ainda tin e boluntat tambe di sostené otro”, Van Kappen ta bisa. “Pero por lo pronto ainda Hulanda lo no mete. Un di e kosnan ku e paisnan (karibense) por hasi, espesialmente Kòrsou, ta drecha nan legislashon.”
Ei Van Kappen ta mishi ku un punto peníbel pa Kòrsou: nunka e pais no a drecha su legislashon. UNHCR (Komisario Mayó pa Refugiado di Nashonnan Uní ta trata e petishonnan pa asilo i ta pone esun ku pidi den un otro pais no na Kòrsou.
Aruba si tin legislashon di asilo, pero ei tambe e prekupashonnan ta grandi. Segun Evelyn Wever-Croes último lunanan 1500 venesolano a ‘keda atras’. “Pa nos esaki ta hopi. Nos mester hasi palabrashon den relashon di falta di espasio.