ROTTERDAM – Kòrsou djamars a usa e torneo di beisbòl World Port Tournament (WPT) pa presentá nan mes. Minister di Desaroyo Ekonómiko Steven Martina a tene un spich na e evento Baseball Means Business. Ku esaki e ta spera entre otro di lanta interes di invershonista pa Kòrsou.
Beisbòl, e deporte number un di pueblo na Estádos Unídos i Asia sùit-ost, por ta un medio adekuá pa inspirá konfiansa den relashonnan komersial. Direktor di torneo Paddy Roomer: “Na Hapon tin bia ta dura dos aña promé ku bo sera un poko ku nan. Via beisbòl mi a yega di mira ku na kabamentu di e anochi komersiantenan hapones ku a haña un pèchi i un shirt, tabata pone brasa rònt di otro su skouder i bisa: nos ta amigu.”
Andruw Jones
Di e manera aki anteriormente a inkluí Andruw Jones den un mishon komersial pa Hapon. Algun hende importante ei tabata haña ku ta un honor pa por dun’é man. Segun minister plenipotensiario Anthony Begina Kòrsou por hasi mas ku esaki. “Resientemente mi a papia ku promé minister Mark Rutte i Minister Bert Koenders (Asuntunan Eksterior). Nan a konsehá nos di hasi mas uso di e mishonnan komersial. Nos a palabrá ku lo embolbí nos mas tantu den e mishonnan.”
Pa e motibu aki Martina ta menta (èks) hungadó manera Jones, Didi Gregorius i Kenley Jansen den su spich. Nos ta mira oportunidatnan grandi pa e promoshon di Kòrsou pa nos peloteronan. Tur nos deportistanan ta nos embahador. Pensa tambe riba nos futbolistanan ku a kaba di gana Caribbean Cup.”
Begina: “Nos mester organisá esaki mihó. Awor nos ta ripará ku ta poko tempu numa nos tin ta traha ku e modelo ei.”
Major League Baseball
Kenneth Gijsbertha, minister di Finansa: “Nos mester di nos hungadónan na Merka hopi pa promové turismo deportivo.” Ta e intenshon pa aki dos aña kuminsá ku konstrukshon di un stadion ku un edifisio di apartamento serka dje na Kòrsou. E peloteronan profeshonal mester entusiasmá e invershonistanan.
Minister di Finansa Kenneth Gijsbertha ku un buki tokante e tim di beisbòl hulandes na World Baseball Classic. Potrèt Pieter Hofmann
Gijsbertha ta spera tambe di atraé e kompetishon profeshonal di beisbòl pa Kòrsou. E entrenamentunan di hubentut di e timnan di MLB ta retirando for di un Venezuela instabil. “Mi konosé kuater tim ku ta dispuesto pa bini. Mi a papia ku Baltimore Oreoles, i San Francisco Giants ke bini sigur. Si nos por haña e medionan pa traha na e infrastruktura pa esaki, den kuater aña nos por organisá MLB camps (simannan di entrenamentu pa talentonan hóben).”
E siman aki e delegashon merikano ta bini Kòrsou pa bin papia tokante ‘MLB Camps” i pa lanta un Winter Ball League, un kompetishon di den wenter kaminda profeshonalnan di beisbòl por haña fama hungando. Gijsbertha: “Pero tur kos por logra òf laga ku e sèn pa e infrastruktura. Si Kòrsou mester hasi esaki nan so, lo bira difísil. E presupuesto mester klòp si.”
Ret
For di Kas di Kòrsou Begina ta traha na maneho di relashonnan: “Ta mi enkargo pa traha un laso ku e Yunan di Kòrsou, i edifiká un ret na Hulanda i Oropa ku tur hende ku tin un kurason kaluroso pa e isla.”