WILLEMSTAD – Korte di Hustisia di Kòrsou a sentensiá Gerrit Schotte na tres aña di kastigu i sinku aña ku e no tin e derecho di keda elehí den parlamento. Su pareha Cicely van der Dijs a keda sentensiá na 15 luna di prizòn.
Huntu ku abogado Marije Vaders, inmediatamente e pareha a yena e papelnan di kasashon i a hura di bringa ta na final. E pareha lo mantené nan libertat te ora esaki keda konkluí, pero mester entrega nan pasport.
E reakshon di Norman Serphos, Gerrit Schotte, Cicely van der Dijs, Charles Cooper i Gilmar Pisas
A kondená Schotte i van der Dijs pa falsifikashon di faktura, labamentu di plaka i a keda haña kulpabel di soborno. Den korte e pareha no a reakshoná ora e veredikto a keda pronunsiá, pero ora nan a sali pafó nan a ekspresá nan desapunto i disgustu ku e sentensia. “E veredikto aki mester duna nos komunidat miedu, pa mira kon hustisia ta manehá individuo ku no ta fit den e sistema ku e hulandesnan ke strukturá e pais aki”, Schotte a deklará.
Derecho di silensio
Schotte a splika ku na e promé instante nan a apelá na nan derecho di silensio, pero den apelashon nan a duna amplio splikashon i a bini ku ekspertonan ku mester a trese klaridat riba kada punto i a refutá e akusashonnan, pero lamentablemente esaki no a hasi niun diferensia den e sentensia di awe
Reakshon di Gerrit Schotte
Tambe presensia den korte di Sr. van der Schans komo Abogado General suplente tabata un punto di kontienda pa e pareha. Nan ta tilda van der Schans di a gaña tokante e korespondensia ku fiskal italiano Pelicano, komo konsekuensia ku esaki no a testiguá na defensa di Schotte i van der Dijs. “Na momentu ku nan hasi algu inkorekto nan ta bai asina leu di tapa pa otro ora kometé fayonan garafal”, Schotte a kontinuá.
Bosero di ministerio públiko, Norman Serphos, di su banda ta satisfecho ku e veredikto, ya ku esaki ta kompletamente konforme loke nan a pidi, pero ta enfatisá ku esaki no ta motibu di hubileo. Schotte a keda absolvé di e asuntu ku e pasaporte diplomátiko, pero esaki no ta pisa mes un pisá manera e akusashonnan mas importante ku a keda para, según Serphos. Awó ku Schotte i van der Dijs a opta pa bai kasashon esaki por tuma entre 6 i 12 luna mas promé ku bin un resolushon final den e kaso.
Kompatriotanan Cooper i Pisas tambe tabata presente den korte i a ekspresá nan desapunto pa ku e veredikto. “E kaso aki ta un persekushon polítiko pa eliminá Schotte fo’i polítika. E pais aki ta den gara di hustisia di klase”, Cooper a deklará. Según Pik Pisas, MFK tei pa keda i e echo ku Schotte ta afó, lo dun’e amplio oportunidat pa determina e mihó desishon pa e partido, pues tur miembro di partido mester keda trankilo.