WILLEMSTAD – “Un sangramentu serebral, un tumor òf kisas nèt nèt nada. Asina dòkter di.” Timo Vermeij tabatin doló di kabes lunanan largu i tin bia e tabata mira dòbel: Un skèn di MRI mester a saka ‘fo ta kiko falt’e, pero e tempu di warda tabata sigur tres luna. “Pa bo pensa tres luna largu ku porta bo ta bai muri ta masha teribel.”
Un aparato di MRI por duna kontesta tokante hopi malesa manera tumor, osteoporósis òf un sangramentu serebral. Ya añanan largu tin un tempu di warda pa e skèn di MRI na Hòspital Sint Elisabeth (Sehos). E aparato ta bieu (2003) i hopi bia no por us’é pasobra e ta den mantenshon. Si ta kos di purá ta manda e pashènt afó.
Gastunan haltu di manda pashènt afó
E presidente di e Asosiashon di Specialistanan Médiko Alex Saleh ta bisa ku masha tempu mester a remplasá e MRI-scan. E ta bisa ku ta krusial pa e funshonamentu sano di hòspital pa invertí den aparato. “E direktiva mester analisá ta kiko ta stanka i ki aparato ta kousa problema. Pasobra no ta invertí den aparatura, pero tampoko den personal, muchu pashènt mester mester bai afó.
E gastunan di mandamentu afó na 2016 tabata 41.3 mion florin. Na e hòspital nobo ku ta konstruí banda di e hòspital bieu, mester bini un aparato MRI nobo. E hòspital nobo lo funshoná te na 2019.
Saleh mes ta internista i e tambe ta ripará e konsekuenshanan di e falta di aparato nobo. “Tuma por ehèmpel e aparato ku mi ta hasi endoskopia kuné: e ta nobo nobo ma nos no tin un manera pa desinfektá e aparato. Ke men e aparato ta inutil.
Para operashon
Na mart Sehos mester a stòp un temporada ku operashonnan no urgente: no tabatin material pa hasi tur operashon. “E ora ei ta haña un solushon pa e momento, pero nunka nos no sa kon largu. E problema mes ta keda.”
Segun Saleh e debenan serka e provedornan di material ta sigui subi i ta sobra tiki hende ku ke hasi negoshi ku Kòrsou. “E reputashon ta bira mas i mas malu, espesialmente na Estádos Unídos, i asina mester sigui buska provedor nobo, hopi bia mas karu.”
E direktor general nobo Anthon Casperson i e Konseho di maneho nobo na yüni a divulgá nan ‘vishon i strategia pa reorganisashon’. Casprson a pidi pa tene ‘pasenshi’ si ta trata di e falta króniko di material.
Fondonan èkstra
Direktiva no ker a reakshoná riba e situashon aktual di e falta di material. Sí e direktor di Sehos Franke Scheper a indiká anteriormente ku nan ta traha pa drecha e sifranan anual . “I esakinan por mustra kon pèrtá e situashon finansiero ta”ku nos mester di fondo èkstra”.