WILLEMSTAD – Tur siman tin trinta barku di Venezuela ku ta importá prinsipalmente fruta i bèrdura pa stòk e merkado kurasoleño. Pero pasobra presidente venesolano Nicolás Maduro unilateralmente pa 72 ora a para tur tráfiko aéreo i marítimo ku e islanan ABC (Aruba, Boneiru i Kòrsou) e situashon ta tenso na e merkado di fruta venesolano na Willemstad.
Segun Maduro e ‘mafia na e islanan’ ta pasa hopi kontrabanda for di Venezuela. Bendedó na e merkado di fruta venesolano Angel Delgado, ta sufri daño mésora ku e medida aki, ku ta dura te djamars meinta. Delgado ta rekonosé ku semper tin kontrabanda ta pasa e fronteranan di Kòrsou, pero no den e kantidat ku gobièrnu venesolano ta deskribí. “Awor hustu ta paga pa pekadó”, e ta haña.
Un reportahe di Deya Mensche
E bendedó di fruta ta konta ku sinku luna pasa so numa e kònsel venesolano a registrá i akreditá tur barku di Venezuela. “Awor e bendedónan mester tin un karchi di identidat i ora nan sali Venezuela nan mester paga un impuesto.” E barkunan ta keda mas o ménos dos luna den haf di Kòrsou i ta paga un promedio di 1800 pa 2000 florin na impuesto pa e produktonan ku nan mester importá na Kòrsou.
Bendedó di fruta Angel Delgado. Potrèt: Deya Mensche
Despues ku Maduro a anunsiá e medida djabièrnè na televishon di estado venesolano, promé minister di Kòrsou Eugene Rhuggenaath a tene un reunion di urgensia ku kònsel venesolano Marisol Gutierrez de Almeida. Segun Rhuggenaath seramentu di frontera no ta kontribuí na un solushon pa kombatí tiramentu di kontrabanda eksistente; “pero nos ta habrí pa deliberashon tokante kombatimentu di negoshi ilegal. Te asina leu ku nos sa e koperashon entre e outoridatnan di Kòrsou i di Venezuela ta tuma lugá na un manera korekto i konstruktivo.” For di djasabra a kanselá tur vuelo pa Venezuela te próksimo aviso.
Mihó kòntròl
Mary Ann Goiri-González, e representante di Venex – e asosiashon di interesnan di venesolano na Kòrsou – ta kere ku e embargo di presidente Maduro por tin konsekuensha serio. Segun Goiri-Gonzáles Maduro a tuma su desishon apruptamente, pa kita atenshon di e situashon den su propio pais. “Mirando e sirkunstanshanan humanitario krítiko di Venezuela, gobièrnu hulandes, huntu ku e gobièrnunan di e islanan, masha dia mester a tuma medida pa kontrolá fronteranan mihó riba e fluho di hende ilegal i kontrabanda.”
Tòg Goiri-González ta kere ku e tarea pa kombatí kontrabanda ta espesialmente di gobièrnu venesolano. “Presidente Maduro ku e medida espesialmente ke hala atenshon di nos mandatarionan”, e ta pensa.
Bishita di gobernador di Falcón
Durante di e spich na televishon presidente Maduro entre otro a bisa ku e gobernador di e estado venesolano Falcón, ku ta keda na Laman Karibe, pronto lo bishitá e islanan ABC pa papia tokante komersio i kontrabanda entre e islanan i Venezuela.