WILLEMSTAD – E akusashonnan di Venezuela kontra di Kòrsou riba kontrabanda di oro, djamanta i koper no ta riba mesa mas. Asina minister di Finansa Kenneth Gijsbertha a duna di konosé despues di a logra konvensé e representantenan di gobièrnu venezolano ku Duana di Kòrsou ta kumpli kabalmente ku tur regla eksistente.
Kenneth Gijsbertha den kombersashon ku José Manuel Dias
“Nos no tin nada di haber ku ningun tipo di trafikashon, ni oro ni djamanta òf otro tipo di mineral i nan a komprondé esei”, Gijsbertha ta enfatisá. Esaki ta un di e puntonan ku a keda akordá djabièrnè último na Aruba durante un reunion importante ku a tuma lugá entre representantenan di Kòrsou, Aruba, Boneiru i Venezuela.
Embargo
No opstante e negosiashonnan intensivo pa kita e embargo ku presidente venezolano Nicolas Maduro a imponé riba Aruba, Boneiru i Kòrsou, esaki no a duna e resultado deseá i e blokeo komersial a keda vigente. A resultá ku e representantenan di gobièrnu venezolano no tabatin outorisashon di presidente Maduro pa tuma un desishon riba e punto aki.
Migrashon ilegal
Durante e reunion aki e delegashon di Kòrsou a hala atenshon tambe riba e kresiente problemátika di trafikashon di hende i migrashon ilegal for di Venezuela ku ta drenta Kòrsou ku arma i droga. Riba e punto aki e delegashon venezolano a bai di akuerdo pa lanta un komishon miksto ku lo mester bini ku solushonnan pa e problema aki. No opstante ku ainda mester ofisialisá e akuerdo ku a yega na dje ku Venezuela tantu minister Kenneth Gijsbertha di Finansa komo minister Quincy Girigorie di Hustisia a bisa di ta satisfecho ku e resultadonan optené.
Quincy Girigorie den kombersashon ku José Manuel Dias
Ku e akuerdo aki Kòrsou ta spera no solamente di por baha e trafikashon ilegal di hende, arma i droga pero tambe di baha e gastunan ora ku tin ku deportá venezolanonan ilegal. “Ambos pais ta bai kompartí informashon riba migrashon ilegal, kontrabanda , trafikashon di arma i droga i alabes oumentá kòntròl”. Asina minister Girigorie a duna di konosé.
Un investigashon ku a hasi riba e resiente kaso di e kuater venezolanonan ku a bin haña morto na Koral Tabak komo konsekuensia di noufragio, ta mustra ku ta trata aki di personanan ku a yega di bini Kòrsou mas biaha. Segun promé minister Eugene Rhuggenaath mirando esaki no por papia akinan di refugiadonan pero di migrantenan ekonómiko.
Oumentu di botonan
“For di dia ku presidente Maduro a anunsiá seramentu di frontera a konstatá un oumentu den e kantidat di botonan venezolanonan ku ta purba di drenta Kòrsou ilegalmente”, Rhuggenaath ta indiká. E promé mandatario ta boga pa bini mas koperashon entre Venezuela i Reino Hulandes pa por ataká e kresiente problemátika di migrashon ilegal ku ta afektando e islanan ABC.