KRALENDIJK – Defensor di Mucha Margrite Kalverboer ta pensa ku e por hasi hopi pa mucha di Boneiru, asta si su ofisina no ta keda na e isla. Un punto di informashon ku anteriormente a planeá na Boneiru probablemente lo haña un otro forma. Esaki ta un konklushon ku Kalverboer a saka despues di un bishita siman pasá.
“Mucha na Boneiru no ta haña ku ta un problema, sino asta un bentaha ku nos no ta den komunidat aki, pa asina informashon no yega serka hende ku nan konosé”, Kalverboer ta bisa. Nan ta haña masha bon si e kontakto tuma lugá via WhatsApp, Facebook òf mail, basta nan haña un kontesta personal.
Kalverboer ku ta den funshon for di 2016 i ku no tin un bùdjet separá pa Hulanda Karibense, tòg ke bini e islanan dos bia pa aña pa sita i kombersashon ku mucha i instansha. Pasobra ora sera konosí personal esaki ta duna un bista diferente di e islanan: “for di Hulanda Oropeo ta pone hopi énfasis riba ‘e historia grandi’”, Kalverboer ta bisa, “kaminda asuntu manera pobresa i violensia doméstiko ta haña atenshon. Ora bo papia ku hende e matis ta sali mas.”
Derecho penal hubenil
Un di e tópikonan ku e Defensor di Mucha ta trese dilanti ta e ousensia di derecho penal hubenil na Hulanda Karibense: “Nos a papia di esaki ora nos tabata na prizòn. Mester bini derecho penal hubenil, pero si bo no tin e bo mester buska alternativa.”
] Kalverboer entre otro a papia ku e konseho di alumno di Liseo Boneriano. Potrèt: Kinderombudsvrouw
Pobresa tambe ta un punto importante, ounke Defensor di Mucha no ta mete direktamente ku polítika. “Nos tin e tratado di derecho di mucha i mucha tin derechi riba un standart di bida ku ta sufisiente. Ta masha kompliká, bo no por solushoná esaki solamente for di Hulanda. Mester subi e kompensashonnan sosial, pero esakinan ta liá na e suèldunan i esaki ta algu entre dunadónan di trabou i trahadónan. E partidonan nan ku nan mes mester bini kla ku esaki.Pero lo mi indiká ku e standart di bida aki mester subi i ku hopi problema di mucha aki ta relashoná na muchu poko di kome i mayornan ku a kansa di eduká ora nan sali trabou i ku e muchanan mes mester yuda nan kurpa.”
Konosí
E defensor di derecho di mucha mester bira mas mihó konosí si: “Ta awor numa nos a kuminsá aki. Kuminsamentu di siman ainda nos tabata pensa: nos mester ta serka , i presente físikamente. Esaki no ta loke nos ta tende di e muchanan i profeshonalnan. Nos tabatin yen di foyeto, pero esei no ta nesesario, pasobra aki e hendenan no ta lesa mashá.” Loke si ta traha bon ta presentashon visual, manera sine i un bon website na diferente idioma.
Kalverboer ta pensa ku e ta den un bon posishon pa ehersé influensha. Tin bia esaki ta sosodé den kaso individual, pero tambe ora di akohida di mucha òf transpòrt. “Aki kisas nan no konosé nos ainda, ma na Hulanda Oropeo si nan ta tuma nota ora nos bisa algu. Ke men, bisa nos kiko ta kiko, mihó informá nos ta, mas influensha nos por ehersé.”