KRALENDIJK – E pregunta si un mandatario òf parlamentario mester baha, último shete luna a dominá polítika di Boneiru. El a kondusí na un proposishon pa un protokòl di integridat den e kódigo di kondukta i un screening di polítiko, pasobra no ta posibel pa fòrsa un bahamentu.
Na yüni di 2017 a arestá e diputado Clark Abraham , despues ku su kasá a duna keho di maltrato i kiebro. Despues a deten’é dos biaha mas pa kiebro, stalking i violashon di e prohibishon di kontakto, i tambe pa maltrato di e amante di su kasá. Pero el a ninga di baha, pasobra e ta persistí di ta inosente.
Baha
Den Konseho Insular e oponentenan polítiko di Abraham, lider di Partido Demokrátiko (DP) na yüni kaba a insistí pa e baha. El a pone su funshon disponibel na Konseho Insular, pero esaki no a tuma akshon. Su aliadonan polítiko (MPB) no a papia nada tokante e kaso.
Despues di e di dos detenshon na sèptèmber – entretantu Abraham a bira Miembro di Konseho Insular den oposishon – e diskushon a ripití su mes. Un sospecho di violensia doméstiko ta muchu serio pa e sospechoso por keda traha, segun koalishon. Gezaghèber a papia ku Abraham, pero no tin regla pa forsa un polítiko sospechoso di baha. Den e protokòl proponé si lo bini un stipulashon kon pa trata ku sospecho.
Un dies piku interesado, espesialmente famia i amigu di Abraham, a bini e seshon.
Sosten
E miembronan femenino di e koalishon di gobièrnu siman pasá a bini ku un deklarashon, ku ta inapropiá pa sali na defensa di un hende ku ta sospechá di violensia doméstiko. Famia i amigu di Abraham riba social media a defendé e sospechoso i a ataká fiskal Henk Starrenburg, pasobra e lo no ta independiente.
Ayera e kaso a bini dilanti wes, loke tabata un alivio tantu pa Starrenburg komo pa Abraham mes. Ministerio Públiko (OM) ta haña ku den social media a pinta ‘un imágen di un banda so’ di OM. Abraham a reklamá, refiriendo na un komunikado di prensa, ku OM a hañ’é kulpabel promé ku wes a dikta sentensia.
Maltrato
Abraham tabata aliviá ora Starrenburg a pidi apsolushon pa e maltrato di su kasá i pasobra mésora a kanselá su detenshon preventivo. “Nunka mi no a dal un hende muhé”, el a bisa wes. OM no a konsiderá e maltrato pruebá, espesialmente pasobra e esposa a kambia su deklarashon. Pa e sobrá kehonan, kiebro, stalking i maltrato di e amante, Starrenburg a eksihí 128 dia será di kua 90 kondishonal.
Abogado Eddy Winkel di Abraham a eksihí apsolushon kompleto i pa wes disidí ku e no ta kulpabel pasobra ta defensa legítimo. Abraham den e seshon a bisa ku e último lunanan e mes diferente bia a haña menasa i maltrato serka e amante ku ta un deportista di lucha profeshonal: “Mi tabata sinti mi meskos ki un bala di trein pa bòks.”
Nunka OM no a hasi nada ku e keho ei. Ainda tin un investigashon ta kore di e último denunsia di Abraham. Sentensia ta dia 28 di febrüari.