Pòrtrèt: José Manuel Dias

WILLEMSTAD – Curaçao Steelband ta preparando pa introdusí músika di steelband bèk den marchanan di karnaval manera tabata e kaso den pasado. Pero e biaha aki no tokando e ritmonan di kalipso i soka sino tumba di karnaval riba instrumentonan totalmente akústiko. Fundashon J.A.G. enkargá ku organisashon di karnaval ta apoyá e inisiativa aki.

“Si nos no logra pa e aña ku ta bin, sigur pa e di 50 edishon di karnaval di Kòrsou nos lo ta den marcha di karnaval”. Asina lider di Curaçao Steelband Henny Cornelia a garantisá. Ku esaki Cornelia ta spera di no solamente rebibá e ambiente di steelband den karnaval pero tambe di reskatá i promové e músika di steelband na Kòrsou.


Un reportahe José Manuel Dias

Habri karnaval ku Steelband
Presidente di Fundashon J.A.G. Hubert ‘Juni’ Aniceta enkargá ku organisashon di karnaval 2018 i 2019 ta risibí e inisiativa di Cornelia ku brasa habrí. “Steelband mester habri nos marcha di karnaval pasobra e ta nos historia, ta einan nos karnaval a kuminsá”, Aniceta a enfatisá.

Curaçao Steelband den su konstelashon aktual tin dies aña di eksistensia i ta e úniko banda di steelband ku ta toka kompletamente akústiko pues sin instrumentonan eléktriko òf elektróniko.