Pòrtrèt: Unidat di Bario

WILLEMSTAD – Bario di Fleur de Marie a transformá di un bario ku hende ta prefera na desviá, den un fuente di atrakshon. Turista i lokalnan awor ta hopi interesa den e infrastruktura i tambe habitantenan dje bario. E situashon a kambia despues ku a implementá e asina yamá: ‘Integrale Wijkaanpak’.

For di aňa 2000, Fleur de Marie tabata riba lista di gobièrnu pa haňa un revitalisashon. Na 2008 a bira konosi ku USONA i AMFO ta finansia e desaroyo integral dje bario. Unidat di Bario a haňa e enkargo pa atende ku e aspekto sosial.

Presidente di Unidat di Bario, Jeanette Juliet-Pablo ta splika:


Outor Dulce Koopman

E problematika di adikshon, tambe ta un dje aspektonan di pobresa, na Fleur de Marie. Apesar ku mientrastantu Fleur de Marie a bira mas asesibel, e problema aki no ta kompletamente solushoná.

E parke na entrada di Fleur de Marie, ta kontribui hopi na e desaroyo positivo. Jeanette Juliet-Pablo : ”Bo ta mira ku e parke tin mas funshon, tin mas hende ta riska biba den e bario.”

“Awor tin tambe hopi interes pa aktividatnan sosial. Tin tambe mas ofisina ta habri e bario. Bo ta mira ku henter e aserkamentu a trese tambe henter un otro manera di mira e bario. I esei tabata nos intenshon”, e presidente di Unidat di Bario, ta aňadi.

Jeritza Maduro i Rosa Grotestam di Kushina di Bario Fleur de Marie. Pòrtrèt: Dulce Koopman

Kushina di Bario
Jeritza Maduro, ta kordinadó di e Kushina di Bario di Fleur de Marie. E mes no ta biba den e bario, pero a asepta e petishon pa yuda desaroya Fleur de Marie. Huntu ku su asistente, Rosa Grotestam, nan ta kushina i bende, den siman , pa habitantenan i tambe hendenan pafó di e bario.

“Tin bon ambiente den e bario. Nos ta kushina tambe pa algun penshunado ku ta bin buska nan kuminda tur dia i despues nos ta sigi atende e otro hendenan”, Jeritza ta splika. “Mi ta haňa ku Fleur de Marie a kambia hopi, pasobra mi no tabata konose e bario asina aki. Ademas ela bira nechi tambe”.

Kon ta sigi ku e desaroyo?
Tur aktividat relashona ku postkuido ta kosta sèn. Esaki ta konta tambe pa Fleur de Marie. Ademas tin mester di hende ku konosimentu dje materia pa sigi guia e proseso. E hecho ku gobièrnu ta kòrtando den e subsidio di organisashonnan no gubernamental, manera Unidat di Bario, por limita tambe e servisio ku Unidat di Bario por duna. “No por depende riba boluntarionan pa tur kos.

E kòrtamentu di e sosten di gobièrnu lo afekta Fleur de Marie tambe, pero mi no ta spera ku lo ta hopi. Sinembargo mester skoge kiko bo ta bai sigi hasi”. Asina Jeanette Juliet-Pablo, a konkluí.