Pòrtrèt: Pixabay

ORANJESTAD – Gobièrnu venesolano djaweps anochi a disidí di sera e fronteranan ku Aruba, Boneiru i Kòrsou ainda mas hermetikamente. Asina e úniko i último buelonan komersial di Aruba Airlines i Albatros Airlines pa Venezuela no por a sali djabièrnè.

Presidente venesolano Nicolas Maduro for di 5 di yanüari kaba a disidí pa para tráfiko komersial ku e islanan ABC pa motibu di ‘kontrabanda di artíkulo for di e pais pa mafia di e islanan’. Tòg Albatros Airlines i Aruba Airlines ainda tabata bula di Aruba pa Venezuela. Tambe na yanüari tabata manera, despues di deliberashon kumbre ku Venezuela, ku e blokeo a relahá. Pero for di djaweps anochi nada di esaki.

Perhudiká
Desena di pasahero, ku e kanselashon di e último buelonan for di Aruba pa Venezuela, a mira nan biahe di bai kas, òf bai serka famia i amigu, kai na awa. Sophie (37) ta un di esnan perhudiká. Algun siman pasá a deportá su amigu for di Kòrsou pa Venezuela i e tabata spera di por a bishit’é tòg for di Aruba. Ainda Sophie no sa kiko e ta bai hasi awor. E no ta stòp di purba: e ta pensa un plan nobo, asina el a laga sa.

Kontrabanda di oro
No ta kla kon largu e bòikòt di Venezuela lo dura na e islanan ABC. Anteriormente Hulanda, Kòrsou i Aruba a ekspresá e speransa di por yega na un solushon huntu ku Venezuela pa kombatí kontrabanda. Pero no ta mustra manera tin un solushon berdadero.

Pregunta den Tweede Kamer
Na yanüari a hasi pregunta den Tweede Kamer na Hulanda tokante e kontrabanda di oro di kua Maduro ta akusá e islanan. Pero e hasidó di pregunta Ronald van Raak di SP no ta satisfecho ku e kontestanan di sekretario di estado Raymond Knops (Relashonnan den Reino) i p’esei el a bolbe hasi pregunta. Knops a laga sa e siman aki ku e mester di mas tempu pa kontestá e preguntanan ei.