Portrèt: José Manuel Dias

WILLEMSTAD – Losmentu di awanan kontaminá den laman ta kontinuá na gran eskala i ta peligrá eksistensia di mas di trinta piskadó ku ta piska na Shut. Esaki no opstante ku dos aña pasá gobièrnu a invertí alrededor di 1.6 mion florin den un stashon pa los i prosesá awanan sushi na Seru Fortuna.

“E kos aki ta perhudikando nos den tur sentido. E kontaminashon di laman ta pone ku kada dia tin ménos piská”, Bart konosido piskadó di Shut ta bisa.


Outor José Manuel Dias

E stashon di Seru Fortuna lo mester a trese un solushon pa e kontaminashon di laman ku ta tuma lugá diariamente na Shut. E instalashonnan pa los awa ta situá dilanti di e entrada pa bai Shut i kla for di febrüari 2016 pero nunka a drenta den operashon. E sistema ta konsistí di tankinan bou di tera i un pòmp ku mester manda e awanan pa e planta di purifikashon di Klein Hofje.

Fayo den diseño
Un fayo den e diseño di e stashon na Seru Fortuna ta pone ku no por separá e awanan. “E sistema no por prosesá e awanan di un forma responsabel pa Klein Hofje”, minister Zita Jesus-Leito di infrastruktura ta atmití. E planta di Klein Hofje por risibí solamente awanan di fekalia. E no ta trahá pa prosesá awanan ku ta kontené kímiko òf zeta den dje ni tampoko awa salu.

“E problema ta hopi serio, 99 porshentu di e awanan ku ta prosedente for di restorantnan tin kímiko òf zeta den dje”, Michael Dijkhuizen di Dijk Transport NV ta enfatisá. Entretantu minister

Piskadonan na Shut. Potrèt: Jose-Manuel-Dias

Jesus-Leito ku a heredá e problema aki for di eks minister Suzy Camelia-Römer a ordená un investigashon pa wak ta kon bini no a tene kuenta ku e diferente tipo di awanan.

Posibel solushon
Dos aña pasá spesialista riba tereno di maneho Oscar Betrian riba invitashon di Parlamento di Kòrsou a presentá un posibel solushon pa e problema di prosesamentu di awanan ku ta kontené vèt. E solushon ta konsistí di filtra e awanan sushi i añadí un sustansia ku ta eliminá e vètnan di un forma biológiko. Segun Betrian n’e momentu ei e parlamentarionan a mustra interes pa e solushon pero despues e no ta tende nada mas di Parlamento.

Minister Jesus-Leito a bisa ku ta buskando un solushon pa e problema di stashon na Seru Fortuna i ya kaba a pidi un oferta serka un kompania kolombiano pa prosesamentu di awanan salu.