KRALENDIJK – Gabinete Rutte den e akuerdo di gobernashon ta primintí di kombatí pobresa na Hulanda Karibense. Realidat ta ku pobresa na Boneiru ta oumentá ku e sistema nobo di tarifa di awa i koriente.
Asina Kolegio Ehekutivo (KE) ta bisa awor ku ministerio di Asuntunan Ekonómiko i Klima (EZK, Economische Zaken en Klimaat) a otorgá ménos ku mitar di e supsidio di koriente ku a pidi.
E kontribushon di EZK na e gastunan di ret (tarifa fiho) lo mester a kompensá e konsekuenshanan desfaborabel pa e bibiendanan di mas chikí. Ku e promesa aki Hulanda a fòrsa pasa e Lei elektrisidat i awa di bebe BES riba 1 di yüli 2016, pero segun KE Hulanda no a hasi bon investigashon delantá di e konsekuenshanan.
Bònt di konsumidó ta pronostiká un desaster sosial
A introdusí e struktura di tarifa nobo na Saba i Sint Eustatius aña pasá sin muchu kos. Na Boneiru e lo drenta na vigor dia 1 di aprel ku konsekuenshanan desastroso pa bibienda chikí. Gobièrnu insular ta haña sosten di e opinion aki serka organisashonnan di konsumidó, sindikato, empresario, i e fundashon di kas FCB. E bònt di konsumidó Unkobon ta pronostiká un desaster sosial.
Konseho Ehekutivo a manda un karta di protesta pa Den Haag pa pidi atenshon pa e konsekuenshanan di e sistema nobo. Diputado Ibi Martis ta bisa ku no ta solamente konsumidó ta haña gòlpi, pero ekonomia tambe. “Turismo lo bira mas karu, pasobra pa e sektor di hotèl tambe e tarifanan lo subi hopi. Asina invershonista lo spanta i keda sin bini.”
Remarkabel ku un ministerio si ta komprondé e problema i e otro nò
KE ta haña ku ta remarkabel ku e ministerio di Infrastruktura i Maneho di Awa (I&W, Infrastructuur en Waterstaat) aparentemente si ta komprondé e problema i EZK nò. E petishon pa supsidio di Kompania di Awa i Elektrisidat Boneiru (WEB, Water en Electriciteitsbedrijf Bonaire)) I&W a aprobá kompletamente, i asina e tarifa fiho di bibiendanan por keda riba 7 dòler pa luna. Pa elektrisidat esaki ta bira 34 dòler.
Tòg e usadónan chikí tambe mester bai paga mas pa awa pasobra a kanselá e sistema di tarifa progresivo. “E punto di salida di e lei nobo ta ku tur hende mester haña trato igual”, manager finansiero Marion Manuela di WEB ta bisa. “Esaki ta funshoná bon den un pais grandi, pero mi opinion personal ta ku e no ta bon pa un komunidat chikí manera Boneiru.”
Mantené sistema di tarifa progresivo
WEB ta trata di parti e supsidio di elektrisidat ku si a duna, mas bon posibel. Kliente ku Pagabon, ku ta paga delantá, lo ripará mas poko posibel. Manuela ta pensa ku kliente ku ta paga despues di usa tin bia mihó por kambia pa Pagabon. Pero e konsekuenshanan ta diferente pa kada bibienda i p’esei e no por duna un bista general.
KE ke mantené e sistema di tarifa progresivo. Segun e sistema ei e bibiendanan chikí ta paga poko i e tarifa ta subi segun ku usa mas awa òf koriente. “Esaki ta funshoná bon sinkuenta aña kaba i ta konosí den e region aki.”Martis lo ker a hala e lei nobo un banda, pero pa hasi esaki tin sanshonnan basta pisa.