Pòrtrèt: gobierno di Aruba

ORANJESTAD – Trafico aereo y maritimo por continua entre Venezuela cu Aruba, Corsou y Boneiro awor cu Reino a firma un acuerdo diasabra cu Venezuela.

Na Venezuela  mes e minister di Asuntonan di Exterior Hulandes Stef Blok a firma e acuerdo pa kita e medida cu Venezuela a impone 6 di januari.

Esaki pa motibo di supuesto contrabanda di metalnan di balor manera oro for di Venezuela pa e islanan ABC. Despues Venezuela a uza e sancionnan Europeo como motibo pa laga e fronteranan cera.

Control stricto na frontera
Den un prome reaccion gobierno di Aruba ta bisa cu ‘lo eherce controlnan estricto y lo no acepta ilegalidad’. “Tur persona cu kier drenta Aruba mester cumpli cu rekisitonan legal. Productonan di Venezuela por wordo importa solamente si tin un certificado di origen.”

E gobierno tambe ta bisa cu awor cu e medida elimina Aruba ta considera e relacion cu Venezuela ‘normalisa’.