Pòrtrèt: Tweede Kamer

DEN HAAG – VVD ke pa gabinete splika na plaka chikí pakiko Hulanda ta pone sèn disponibel pa yuda Kòrsou ku detenshon i mandamentu bèk di refugiado venesolano.

Minister Stef Bos (Asuntunan Eksterior) siman pasá durante su bishita na Kòrsou a divulgá ku Hulanda ta bai kontribuí 100 mil euro pa oumentá e kapasidat di detenshon riba e isla. Tambe Hulanda lo manda eksperto di Servisio di Imigrashon i Naturalisashon (IND, Immigratie en Naturalisatiedienst), pa asina por disidí mas lihé ken ta ‘refugiado’ i ken ta manda bèk.

Pregunta den Tweede Kamer
Miembro di Tweede Kamer André Bosman djaluna a hasi pregunta por eskrito na minister Blok i sekretario di estado Raymond Knops (Relashonnan den Reino). VVD ke sa di gabinete riba kua manera Hulanda ta duna e ‘sosten finansiero i tékniko’ na Kòrsou.

Tambe Bosman ta puntra si gobièrnu hulandes ta saka pòtmòni ‘boluntariamente’ òf for di ‘obligashon’ a base di statüt di Reino.
Último simannan gabinete hulandes diferente bia a laga sa ku Kòrsou i Aruba mes ta responsabel pa e akohida di venesolano. Anteriormente sekretario di estado Knops a bisa ku e islanan no mester konta ku Hulanda ‘ta bai saka pòtmòni pa tur kos’.

Refugiado si òf nò?

Hulanda, Aruba i Kòrsou no ta rekonosé venesolano ku yega e isla via avion i barku komo ‘refugiado’. Esaki ta sosodé solamente si e venesolanonan ta bou di menasa polítiko òf si persiguí nan personalmente den nan pais. Te aworakí ta trata espesialmente di hende ku a sali for di Venezuela pa motibunan ekonómiko, Minister Stef Blok, ku ta manehá Asuntunan Eksterior pa e islanan tambe, ta bisa.