Portrèt: Ronald A. Muyden

KRALENDIJK – Resiklahe di sushi na Boneiru sigur sigur lo yuda pa e úniko landfill ku e isla tin no yena aki tres aña. Pero te ainda ta algun inisiativa so tin.

Aña pasá a kolektá 90 tonelada di glas miéntras ku na 2016 esaki tabata 155 tonelada i na 2015 mas o ménos 125. E motibu eksakto pa e bahada aki no ta konosí. Loke sí tin ta ku ta re-usa glas na eskala chikí. Manera Hugo Bernal ku tur djasabra ta entre e bendedónan di produkto lokal na Marshe di Playa ta hasi.

Hugo Bernal, bendedó di glas resikla

 
 

Entre e tenedónan di stènt na Wilhelminaplein por haña Birgit Voss. E boluntario di Fundashon Animal Shelter Bonaire entre otro ta bende tas pa karga kompra. E ta traha esakinan di kòrtina òf sobra di tela pa paña. “Esaki ta mihó pa medio ambiente ku tas di plèstik.” E ganashi ta bai pa e fundashon.

Brigit Voss ta bende tas di tela. Foto Ronald A. Muyden

“Si bo djis pensa kreativamente bo por hasi hopi ku kos ku sobra den bo mes negoshi”

Suzanne ‘Suus’ Zelders ta empresario di drechamentu di bela di barku i kites (un tipo di fli pa sùrf kuné) huntu ku su kasá ta traha tas pa playa di e sobra di paña di bela di nan kompania. “Nos tabatin mas i mas kos di tir’afó di material ku tabata masha adekuá pa hasi otro kos kuné, i esei nos tabata haña ta piká. Ke men e ora ei nos a bai pensa i wak kiko nos por a hasi kuné. I asina e kolekshon di tas aki a originá.”

Suus Zelders ta bende tas di bela di barku i kites. Foto Ronald A. Muyden