DEN HAAG – Ta posibel ku e resibu di koriente di tur luna pa habitantenan di Boneiru lo bira desena di porshento mas karu. Den Haag ainda no tin solushon.
Despues di e konseho di minister semanal na Den Haag – vidio: John Samson
Gabinete hulandes no ta pèrmití mas pa kompania di gobièrnu den munisipio karibense keda operá ku pèrdida. E suministradó di energia WEB ke kobra e gastunan den e resibu mensual di e habitantenan si e kompania di energia no haña e supsidio nesesario.
Gobièrnu lokal na Boneiru ta spera ku minister Eric Wiebes di Asuntunan Ekonómiko i Klima bini ku un supsidio kompletu, pa asina bini un rebaho riba e tarifa fiho. Minister Wiebes mes ta bisa ku e konosé e fail ‘insufisientemente’ pa duna un reakshon.
Segun sekretario di estado Raymond Knops (Relashonnan den Reino) awor ta tene kombersashonnan na e ministerionan i na Boneiru pa haña un solushon.
Solushon mester bini e luna aki ainda
Si no haña un solushon na aprel, e resibu di energia probablemente for di luna di mei lo sali hopi mas karu. Gobièrnu di Boneiru luna pasá na delaster momentu a logra di posponé e tarifanan nobo ku un luna, despues ku siudadanonan a protestá.