WILLEMSTAD –Representantenan di Soy Venezuela a manda un karta na Stef Blok, e minister hulandes di asuntu eksterior, pidiendo esaki pa trata humanitariamente ku e venezolanonan ku ta huyendo pa motibu di e krísis na Venezuela.
Den nan karta, Milos Alcalay, Diego Arria i Victor Rodríguez Cedeño, kende ta èks embahadornan pa Venezuela na Nashonnan Uni, a indiká ku ya tres mion persona a hui e pais pa motibu di e ‘tirania di Nicolás Maduro’.
Hulanda, Kòrsou i Aruba no ta rekonosé e venezolano komo refugiado i lo deporta esaki, apesar ku UNHCR resientemente a deklará e situashon na Venezuela komo un krísis humanitario. E èks embahadornan a asta pidi Hulanda protekshon pa e venezolano, komo e bisiña europeo mas serkano, i a ekspresá preokupashon pa e deportashon struktural fo’i Aruba, Kòrsou i Boneiru.
Marianne Goiri González di VENEX
Angelica Villalobos for di Chile
Patricia Betancourt Brujas, representante di VenEuropa, a asta tilda Hulanda di ta más interesa den proteha e interesnan ekonómiko na Venezuela, promé ku ekstende un man humanitario.
Provishon spesial
VENEX a indiká ku espesialmente vulnerabel pa kai den ilegalidat, ta e kasi dos mil venezolano ku ya a atkerí un permiso di estadia of trabou temporal. Pa motibu di e situashon na Venezuela, nan no por yega na un sertifikado di nasementu of renoba nan pasport ku a vense pa asina renoba nan pèrmit, Marianne Goiri González di VENEX ( venezolano organisá na Kòrsou) ta splika.
VENEX ta supliká gobièrnunan di Hulanda, Kòrsou i Aruba pa introdusí un provishon spesial pa e refugiadonan akí pa asina nan no kai den ilegalidat.
Un mucha ku nase na Kòrsou unda tur dos di su mayornan ta estranhero, outomátikamente e ta haña e nashonalidat di su mayornan i nan mester saka su pasport di nan pais natal promé ku por hasí kualke tramite pa legalisashon.
Pa motibu ku pa basta tempu no tin papel na Venezuela pa drùk e dokumentonan ofisial, e mucha ta keda ilegal na Kòrsou, Goiri ta splika.
Mucha ilegal
Famia Villalobos
Esei tabata e situashon di Angelica Villalobos i su famia, kende a muda pa Kòrsou na 2015. Na 2016, Angélica a haña
un pèrmit pa seis luna, pero su kasá nunka a haña su papelnan. “Mi yu hòmber mas chikí a nase na Kòrsou, pero mi papelnan a bin kla despues ku mi yu a nase”, Villalobos ta splika. “Danki Dios mi kasá tin dòbel nashonalidat venezolano i colombiano, ku nos por a pidi un pasport colombiano pa mi yu ku a nase na Kòrsou.”
Na 2017, famia Villalobos finalmente a bandoná Kòrsou, pa despues di un periodo kòrtiku na Colombia, a kontinuá pa Chile. “Nos tin aproksimadamente tres luna na Chile i ya nos a haña nos pèrmit di estadia.”