Pòrtrèt: Ronald A. Muyden

KRALENDIJK – Nitzaël Padilla Gutierez den apelashon a haña un kastigu di dos aña mas largu pasobra el a tira e polis Ferry Bakx (45) mata den un atrako na ougùstùs 2016.

Korte Komun a sentensi’é na 17 aña será na lugá di 19 aña. Ministerio Públiko a eksihí 19 aña.

Dos otro perpetradó venesolano a haña kastigu mas abou. Chanon Rivera na promé instansha a haña 18 aña i awor ta haña 16 aña, pasobra segun Korte esaki ta mas den balansa ku e otro kastigunan. E kastigu di José Exposito Perez ta bai di 16 pa 14 aña.

William Padilla Marin ta haña un aña mas ku den promé instansha, esta 14 na lugá di 13 aña. Su ruman Francisco mester bai será 14 aña, meskos ku e sentensia na promé instansha. Kontrali na Huzgado na Promé Instansha, Korte no a mira un motibu pa distinguí entre e sospechosonan aki.

E wesnan ta husga ku Nitzaël desididamente a tira riba Bakx pa por hui i sigurá e botin. E ker a evitá ku lo tira su primu, ku Bakx tabata pèrsiguí. Korte a rechasá e sugerensha ku mester mira e atrako i e tiramentu lòs for di otro.

Impakto riba komunidat
Korte tampoko no ta kere den e palabrashon ku e sospechosonan a hasi ku lo no tira durante di e atrako. Pasobra nan a drenta kas di famia Van Dijk na Sabadeco ku sinku arma kargá. Ademas ta tene henter e grupo responsabel pa e planeamentu di un atrako riba e kas di famia De Jongh den e bario Mexico. A kanselá e atrako ei pasobra lo tabata muchu peligroso.

E wesnan den nan veredikto ta konta tambe e impakto ku e atrako i e morto di e polis tabatin riba komunidat di Boneiru, e víktimanan i e famianan di e defuntu. Ku Padilla tòg ta haña un kastigu mas abou ta danki na su aktitut positivo durante di e proseso, e duele ku el a demonstrá i su edat hóben (22). Chanon R. ta haña e kastigu di mas haltu di e otro kuaternan pasobra e tabatin e papel di organisadó i ademas el a smòkel kokaina.

No a bini dilanti den apelashon
Dos sospechoso no a bini dilanti den apelashon. E serebro tras di e atrako, e boneriano Rachyt Saragosa, ku na promé instansha ku 20 aña a haña e kastigu di mas haltu, luna pasá ker a retirá su apelashon. OM i su abogado a insistí i el a disidí pa pensa mas aleu riba esaki. Riba 17 di mei su kaso ta bini dilanti pro forma, kaminda lo disidí si mester di un trato di kontenido ainda.

E di shete sospechoso no a apelá kontra su kastigu di 12 aña