GRONINGEN – Izaline Calister (49) no tabata sa kiko ta pasando ora djaweps sin sa di nada el a drenta stathùis di Groningen. Ei e kompositor i kantante kurasoleño a haña sorpresa serka alkalde Peter den Oudsten i a kondekor’é komo Ridder in de Orde van Oranje Nassau.
Calister su kondekorashon ta spesial pasobra na Hulanda e ta un di e poko hende muhénan di desendensia migrante ku awe ta risibí un kondekorashon. Tur huntu awe 3000 hende den henter Reino hulandes a risibí un lenchi. 24 di nan ta bini di e parti karibense di Reino.
reportahe di Natasja Gibbs
Bo mes no por pidi un kondekorashon real pa bo mes i bo no ta hañ’é tampoko asin’asina. Pa esaki mester nominá bo serka munisipio. Den kaso di Izaline ta e organisashon na interes di antiano OCaN i Verenigd Antilliaans Netwerk a hasi esaki. “Nos ta haña masha importante ku hulandes antiano tambe ta haña rekonosementu pa nan trabou. Izaline Calister ta un hende asina ku a kontribuí hopi”, presidente di OCaN John Leerdam ta konta. “El a hasi masha hopi pa fama i emansipashon di kultura antiano den reino.”
E falta di diversidat den e kondekorashonnan ta prekupá Leerdam: “Pa e motibu ei nos ta sigui empeñá pa kada bia kompletá e lista ku hulandes antiano.” Pero nominashon no ke men ku e persona outomátikamente ta haña un lenchi. Pa esaki bo mester kumpli ku un kantidat di eksigensia i i bo mester a hasi minimalmente dies aña di trabou di boluntario.
Afortunadamente pa Calister no tabatin niun duda tokante su nominashon: “Su trabou ta forma un laso entre e partinan di Reino Hulanda, Kòrsou, Aruba i Boneiru”, segun alkalde Den Oudsten. “Ta kanta su kantikanan na Antia i serka antiano na Hulanda. Ku esaki e ta kontribuí na emansipashon i konosementu di papiamentu na Hulanda i fo’i tera.”
Tokante Izaline CalisterEl a bira hopi konosí na Kòrsou ora ku el a gana e título di ‘Reina di Tumba’ na 2001. Komo ‘Reina’el a tene hopi kòlèkte pa bon kousa. Na 2009 el a risibí un Edison pa su album ‘Speransa’. Calister ta miembro tambe di Konseho di Supervishon di DutchCulture i regularmente pa medio di produkshon di teatro e ta sòru pa por papia tokante e puntonan di doló den Reino. Den e temporada 2012-2016 e tabata miembro di e Komité Nashonal 200 aña di Reino. Calister regularmente ta biaha pa su isla natal Kòrsou kaminda e ta duna lès i workshop na hubentut. |