Pòrtrèt: Ramón Yung

WILLEMSTAD – Despues ku pa sirkumstansianan di tempu mester a posponé entrada dje dos dòknan flotante abordo dje embarkashon Xin Guang Hua dje kompania chines COSCO, djadumingu mainta tempran, Damen Shiprepair ku asistensia profeshonal di CPA a logra tou e embarkashon i drenta bahía di Santa Ana eksitosamente.

video di Ramón Yung

E konsorsio Damen for di òktober di aña 2016 a firma un akuerdo ku gobièrnu di Kòrsou pa tuma maneho di Curaçao Drydock over. Den e akuerdo aki, Damen a komprometé su mes pa sigui amplia e servisio ku Curaçao Drydock tabata ofresé na su klientenan. Curaçao Drydock tabata dispone di dos drydock i un total di 13 kran.

Damen den e akuerdo ku gobièrnu a akordá di lo amplia e servisio, atkiriendo entre otro un dòk flotante i alabes inbertiendo un suma di 40 mion dòler den mehorashon dje infrastruktura i tambe entrenamentu di e personal. Despues di un aña i mei ku a firma e akuerdo, Damen a kumpli ku parti dje akuerdo, dor di manda buska dos dòk flotante for di Rotterdam, na unda tambe nan ta operando i brindando servisio na kompanianan naviero.

Ambishon
Atkisishon di e dos dòknan flotante aki ta di importansia pa Damen Shiprepair Curaçao, pasó dje forma aki nan por kumpli ku e ambishon di kombertí nan mes den e dòk ku ta hunga un papel importante den área di Latino Amérika i Karibe.

Damen Shiprepair a duna hopi publisidat na yegada dje dos dòknan flotante, lokual sigur a akapará atenshon di públiko. Un kantidat grandi di siudadano a akudí na e lado di Punda komo tambe Otrobanda, p’asina presensiá entrada dje barku Xin Gung Hua, riba kual e dos dòknan tabata ubiká. Entrada dje barku Xin Guang Hua tabata algu istóriko, komokiera ku ta trata di un barku ku ta apénas 1 meter i mei mas kòrtiku ku e altura máksimo ku por pasa bou di brùg Juliana.

Despues di algun dia di preparashon ku basta tenshon, e kompania di tou KTK huntu ku ekspertonan di Damen a logra hinka e barku Xin Guang Hua eksitosamente den haf di Kòrsou.