WILLEMSTAD – Un di tres partido pa por laga refineria Isla sigui traha. Ku esaki tambe gobièrnu di Kòrsou ta spera di evitá un krísis grandi for di dia ku ConocoPhillips a pone beslag riba PdVSA.
Den un konferensha di prensa gobièrnu a trata espesialmente di trankilisá pueblo. “No tin motibu pa pániko”, segun promé minister Eugene Rhuggenaath. Anteriormente e sindikatonan PWFC i APRI, ku su presidente Gherrel Remilia, a indiká ku tin hopi intrankilidat bou di personal di refineria. E direktiva di refineria no ta bisa nada, lider di sindikato Angelo Meyer di PWFC ta bisa, loke ta kontribuí na e intrankilidat.
‘Hurídikamente posibel’
Awor gobièrnu ta spera pa promé yega na un solushon den un kombersashon ku PdVSA i ConocoPhillips. Pero minister di Desaroyo Ekonómiko Steven Martina ta enfatisá tambe e búskeda urgente di un di tres partido, ‘e solushon di un ‘joint effort’.
“Suponé ku e beslag keda, e ora ei bo por kumbiní ku PdVSA ku otronan ta importá zeta krudo, djei refineria ta hasi su trabou i por kumpra e produkto final.” Hurídikamente esaki ta posibel e minister ta bisa, pero e kompania venesolano mester koperá si.
Ayera atrobe e nòmber di BP britániko a kai, ku kende Kòrsou den pasado yega di a firma un deklarashon di intenshon kaba. Tin otronan tambe, Martina ta bisa, pero gobièrnu no ke menta nan nòmber promé ku ta mas konkreto.