Portrèt: Ramón Yung

WILLEMSTAD – Tantu na Boneiru komo na Kòrsou wes a disidí ku ConocoPhillips mester anulá su beslagnan riba produkto di zeta i stòk di zeta asina leu ku ta nesesario pa e suministro di kombustibel i koriente riba tur dos e islanan.

Wes a imponé un multa di 1 mion dòler pa kada dia òf parti di dia ku e kònsùrn di zeta venesolano no kumpli ku su obligashonnan. Ku un máksimo di 100 mion dòler.

E sentensianan a bini mas lihé ku a ferwagt, djaluna lo tabatin sentensia na tur dos isla den e kasonan sumario ku gobièrnu lokal a entamá huntu ku otro interesado.

E wesnan den nan sentensia a konsiderá ku ConocoPhillips tin un interes hustu pa sigurá mas tantu posibel su claim riba PdVSA. Pero ku un disputa komersial entre e dos kompanianan aki no ta hustifiká ku por desorganisá un sosiedat kompleto komo konsekuensha di falta di kombustibel i koriente.

Kuenta separá
P’esei lo anulá parsialmente e beslagnan di e kònsùrn merikano. E wesnan ta duna komo kondishon si ku e pago pa e suministrashon di zeta ta tuma lugá riba un kuenta lantá espesialmente pa esaki (kuenta escrow òf di plaka di un terser partido). E plaka mester keda ei te ora ta kla ku ta ConocoPhillips òf PdVSA tin derecho riba e plaka.

Isla tambe mester entregá
Ademas wesnan a sentensiá PdVSA pa den 14 dia kuminsá atrobe ku entrega di kombustibel òf produkshon di materia prima nesesario p’esaki na e refineria kurasoleño Isla. Pa asina Isla por kumpli ku su deber di entrega. Tambe Isla mester kuminsá – i keda entregá kombustibel pa e pago ku a kumbiní, korte ta bisa, te asina leu ku esaki ta nesesario pa e suministro di kombustibel i koriente. I e pagonan ei tambe mester bai riba un kuenta spesial.