Pòrtrèt: Roelie van Beek

WILLEMSTAD – Benta di fruta i bèrdura na barkunan di fruta venezolano a baha drástikamente, pasó Kleine Werf no ta e lokalidat ideal. Esei Javier Cordero, un dje venezolanonan ku ta bende fruta i bèrdura a duna di konosé den un entrevista.

Reportahe di Roelie van Beek

Ta bai kumpli un luna ku e barkunan di fruta venezolano, despues ku a eliminá e embargo di presidente Nicolas Maduro, a regresá Kòrsou. Durante esun luna ku nan ta mará na Kleine Werf, e benta di fruta i bèrdura a baha drástikamente. Javier Cordero ta bisa ku ainda tin yu di Kòrsou ku no sa mes ku nan ta bendiendo fruta i bèrdura na Kleine Werf. Tin problema ku lugá pa por stashoná outo, miéntras ku personanan di edat no por krusa e brùg pa por yega i kumpra lokual nan mester.

E lokalidat no ta ideal tampoko, pasó gran parti di dia e merkansianan ta haña hopi solo i konsekuentemente nan ta daña hopi lihé. Nan ta hibando pèrdida, pasó ku un benta abou i hopi fruta i bèrdura ku ta daña, ta pèrdida so nan tin.

E públiko konsumidó tambe tin su opheshon pa e lokalidat nobo na Kleine Werf. Mayoria di esnan entrevistá tin hopi problema ku espasio pa por stashoná outo ku ta na un distansha poko leu. Momento ku nan kumpra nan merkansia, nan mester karga saku hopi pisá, pasó ta trata di fruta i bèrdura hinté, pasó no ta pèrmití mas pa bende fruta i bèrdura na pida. Tur e públiko konsumidó entrevistá, kier mira e barkunan di fruta bèk na e banda di Sha Capriles Kade.

Diálogo nashonal
Pa loke ta trata e diálogo nashonal, e siudadano Ardith Meriën ta kere ku gobièrnu masha dia mester a tene un enkuesta, pa laga pueblo di Kòrsou ekspresá su opinion pa medio di por ehèmpel un formulario. Pasó na momento ku tene un diálogo nashonal ku ‘stake holders’, ta trata aki di invershonistanan ku plaka ku ke inbertí den proyektonan ku nan por gana plaka, pero nan no ta tene kuenta ku e sentimentu ku ta biba den komunidat i e balor sentimental i turístiko ku e barkunan di fruta aki tin pa Kòrsou.

Balor turístiko
Israel Loaiza, otro dje venezolanonan ku ta gana su pan di kada dia bendiendo fruta i bèrdura a bisa ku hopi kaminda rònt mundu tin merkadonan flotante, pero ku esun di Kòrsou ta úniko. E ta spera ku gobièrnu lo tene debido kuenta ku e balor turístiko ku e merkado flotante aki tin pa Kòrsou. I ku nan lo por regresá Sha Capriles Kade, kaminda pa mas ku 101 aña kaba e merkado flotante tabata ubiká.