Pòrtrèt: Ramón Yung

WILLEMSTAD – E akshon di studiantenan i personal di e instituto di enseñansa profeshional no a yuda: gobièrnu a keda para riba e desishon ku ministerraad a tuma anteriormente, esta ku ta sera Fundashon pa Edukashon i Formashon di Fishi i Kapasitashon (Feffik) na ougùstùs.

E instituto mester di 1,2 mion. Pero Feffik no ta viabel segun gobièrnu i nan a disidí di para e supsidio.

Studiantenan manera Cristian Reyes ta rabiá, Segun e ‘mandatarionan no tin niun klase di interes den hubentut di Kòrsou’. Studiante Shaidrilon Mutueel ta sinti ku ‘gobièrnu ta preferá hinka e plaka den un prizòn nobo en bes di Feffik’. “Pasó gobièrnu mes lo ta premirá ku e studiantenan despues ku Feffik sera su portanan, lo bai resultá den e prizòn den kua nan a inbertí e 100 mion.”

studiante Cristian Reyes

E èks direktor di Feffik, Altagracia Bryson, tambe a sostené e akshonnan pasó el a sali na interes dje hóbennan studiante, asina e ta bisa.

èks direktor di Feffik, Altagracia Bryson

Bryson ta kere firmemente ku no por sera Feffik. El a enfatisá ku e no ta kai bou dje sistema regular di enseñansa, pasó e ta un instituto pa formashon di segundo oportunidat. “Ta kita tur oportunidat for di un hóben ku a kai for di e sistema di enseñansa regular, pa por sigui un òf otro formashon di manera ku den futuro e por gana su pan di kada dia. Si sera Feffik, anto gobièrnu mes ta kreando mas drop-out i hóbennan kriminal.”

Gobièrnu a reuní ku sindikatonan Sitek i ABVO unda a mustra ku ta bai traha riba un trayekto nobo pa garantisá enseñansa di fishi sekundario den segundo oportunidat.

minister di enseñansa Marilyn Alcalá-Wallé

Pa loke ta e studiantenan, e minister a bisa ku e perspektiva di studiantenan ta garantisá. Dje aktual studiantenan di SBO na Feffik, 157 alumno di SBO ta finalisá na yüni 2018, 97 lo bai kore stazje i finalisá aña 2018-2019. Pa loke ta trata studiante den área di enseñansa profeshonal di fishi na Feffik, di 156 alumno di fishi, 113 lo finalisá nan estudio na yüni 2018. Ta sobra 44 alumno ku ta bai kore stazje bou di guia kompetente. Miéntras pa loke ta inskripshonnan nobo pa aña 2018-2019, tur inskripshon nobo, lo kana via e Komishon Sentral ku ta garantisá ku tur studiante lo haña e skol, guia i atenshon korespondiente, segun e minister.

Sindikatonan no ta kontentu
E sindikatonan despues di e reunion ku minister Alcala-Wallé a mustra di no ta kontentu.

Lio Plantijn di sindikato Sitek

E sindikatonan a kere ku mirando e desaprobashon ku tin den komunidat pa ku siere di Feffik, ku gobièrnu lo a drai bèk e desishon. Sindikatonan ta haña ku e desishon ta unu deskabeyá i ku mester tuma mas tempu pa por bin ku e kambionan nesesario na Feffik. Mirando ku gobièrnu ta keda para riba e desishon tumá, e sindikatonan lo bai reuní ku nan miembronan i no ta deskartá e posibilidat ku por bin ku mas akshon.