WILLEMSTAD – Werner Wiels i Aubert Wiels, ámbos tin krítika fuerte riba e forma kon Ministerio Públiko a realisá e investigashonnan den e kaso di asesinato di nan ruman hòmber, parlamentario Helmin Wiels.
Werner Wiels ta konsiderá ku henter e investigashon realisá den e kaso di asesinato di su ruman hòmber Helmin Wiels ta bou di nivel. E ta bisa ku e investigashon a kuminsá bon i tabata avansando. Pero un dado momento a bin dal den sierto elementonan poderoso den komunidat ku ta parti di ‘establishment’ ku tambe a yuda finansiá asesinato di Helmin Wiels i ku kende no por mishi.
Werner Wiels
Esei ta pone ku ta dal diferente tipo di buèlta den e kaso. Esei ta e motibu pa kual Werner Wiels no ta kere mas den e trabou ku ta hasiendo pa por logra solushoná e kaso. E ta kere ku ta ‘un milager’ lo mester pasa di manera ku por logra yega na solushoná e kaso aki.
“Hopi dje kosnan ku ta pasando ta un refleho di nos komunidat. Nos no ta manda mas na Kòrsou, ta ulandesnan ta manda. Ta nan ta disidí kua kaso si i kua kaso nan no ta sigui. Ta un nepotismo tin”, segun Werner Wiels. E ta bisa ku e meta di Ministerio Públiko ta pa sostené e gobièrnu di mucha mandá ku tin aktualmente.
‘Helmin no ta promé ni último ku a laga mata’
Aubert Wiels ta kere ku no a traha di forma diligente riba e kaso aki. “Awor ta buskando un manera pa por sera e kaso aki, pasó tin hendenan haltu i ku hopi poder den komunidat ku ta enbolbí den e kaso. Motibu pa kual no por mishi ku nan i ku tur probabilidat nunka nan lo no haña kastigu.”
Aubert Wiels
Sinembargo e no ta pèrdè speransa, ounke ku tin un wega grandi ku ta wòrdu hungá. Pasó Ministerio Públiko tabatin oportunidat pa por a drecha su imágen den komunidat, pero nan a skohe un posishon ku ta hasi mas daño ku e ta hasi bon.
Segun Aubert Wiels, esnan detené den e kaso di asesinato di nan ruman hòmber, ta esnan konsiderá chikí den e kaso aki. Pasó esnan grandi mes ku ta dispone dje kapital i ku ta tras di asesinato di Helmin Wiels, ta ‘safe na home’. “Helmin Wiels no ta e promé ni último ku e grupo aki a mata, pasó nan lo sigui mata miéntras ku tin menasa riba nan plaka i poder ku nan tin den komunidat.”