Pòrtrèt: Dick Drayer

WILLEMSTAD – Akusashonnan di Ministerio kontra Burney ‘Nini’ Fonseca den e kaso Maximus no tin base i niun klase di sosten, motibu pa kual mester laga Nini liber. Esei su abogado Marije Vader a pidi.

Vaders ayera a presentá ku un defensa hopi amplio i hopi detayá konsistiendo di no ménos ku 93 página. E abogado a tuma mas di seis ora pa presentá su defensa. Tambe e tabatin presentashon riba Powerpoint p’asina proba wes a base di ilustrashonnan, ku su kliente mester ta liber i ku nada di lokualnan ku ta akus’é di dje, no tin un base legal.

Abogado Marije Vaders

Deklarashonnan sin base
El a mustra ku den e veredikto anterior den korte di promé instansha, e wes a basa su veredikto riba entre otro deklarashon di sierto testigunan. Sinembargo, e deklarashonnan di testigunan tabata deklarashonnan sin base. Ademas, pa e wes por a basa su veredikto riba lokual testigunan ta bisa, el a mustra ku literatura ta indiká ku pa deklarashon di un testigu tin base, mester tin ‘waarneming’ o sea puntonan ku ta sostené e deklarashon.

Esei ta hustamente lokual no tin den e deklarashon dje testigu Elvis ‘Monster’ Kuwas. E testigu aki a kambia su deklarashon na vários okashon. Ora ku a puntra e testigu si Burney Fonseca tabata huntu ku nan na kas di Pretu, el a ninga esaki. Mas aleu e testigu no kier a kontestá niun dje preguntanan ku a hasi na dje. Vaders ta kere ku teniendo kuenta ku e akusashonnan tur no tin echonan pa sostené nan, su kliente mester sali liber for di e kaso aki.

Skonde informashon
Mas aleu abogado Vaders den su defensa a mustra ku Ministerio Públiko a duna un interpretashon kompletamente robes na e SMS-nan ku tabatin entre Nini Fonseca i Jamaloodin. Banda di esei Ministerio Públiko a skonde dokumentonan den e kaso aki, ya ku ta trata di dokumentonan ku tabata na fabor di Nini Fonseca. A skonde e informashonnan di ‘zendmast’ i tambe a skonde e informashonnan riba transakshonnan finansiero di Jamaloodin.

P’e motibu ei mes den su defensa e abogado a desbaratá tur lokual Ministerio Públiko a presentá komo prueba kontra su kliente. E abogado tin fe i ta optimista ku korte di apelashon lo bini ku un sentensia ku ta na fabor di su kliente.