Pòrtrèt: Jacqueline Hooftman

WILLEMSTAD – Yu di Kòrsou ta bebe hopi remedi, 120 mion florin na remedi pa aña. Kompará ku Hulanda dòkternan ta resetá un kantidat dòbel di resèpt pa persona sigurá.

“Kuido médiko na Kòrsou ta karu”, inspektor-general pa Salubridat Públiko Jan Huurman ta bisa. Esaki por mihó í mas barata.

Inspekshon pa Salubridat Públiko a pone un lista di remedi registrá na Kòrsou online. Serka mitar di e remedinan aki ta trata di remedi di marka original.

“Por remplasá esakinan pa un gran parti ku remedi genériko. Esakinan ta remedi sin marka ku ta mes efektivo, pero hopi mas barata”, Huurman ta bisa. “Na Hulanda nobenta porshento di tur remedi ta genériko. Na Kòrsou esaki ta konta pa maksimalmente 50 porshento.”

‘Prevenshon ta e palabra klave’

Segun Huurman yu di Kòrsou mester kuminsá bebe ménos remedi. “Uso di hopi remedi ta un indikashon ku kuido di salubridat ta inefisiente.”E ta konstatá ku obésitas, diabétis, preshon haltu i enfermedat di nir ta forma un problema epidémiko. “E enfermedatnan aki por evitá ku bon nutrishon, move sufisientemente, no huma i no bebe muchu alkohòl. Prevenshon ta e palabra klave. Ku remedi òf un operashon bo no ta solushoná esaki.”

Huurman ta mira ku médikonan ta proskribí muchu tèst na laboratorio i diagnóstika ku ta forma sierto imágen. “Hopi médiko ta laga traha un eko, skèn òf potrèt rayo X sin ku tin un indikashon kla ku ta nesesario. Ta posibel pa baha tur esaki ku 30 porshento. Esei lo spar komunidat miónes di florin.