Pòrtrèt: José Manuel Dias

WILLEMSTAD – ‘Bo no por kita nos for di Ref i kibra ku un tradishon pa otronan bin establesé negoshi’. Asina piskadó Victor ‘Broertje’ Supriana ta reakshoná riba e desishon di gobièrnu pa desaroyá e área di Ref i Zakitó inkluyendo e haf di piskadó i kombertí esaki den un zona turístiko.

Un reportahe di José Manuel Dias

Broertje ta registrá na Maneho Agrario i Peska (antes LVV) komo piskadó di e área ku ta keda entre Megapir i e playa di Marriott. Segun e piskadó si e mester bai for di Ref anto e ora ei e tradishon di e yu di Kòrsou di bai Koredor pa kumpra masbangu fresku ta disparsé. E ta antisipá ku una bes nan desaroyá e área aki e lo no tin mag di bini eibanda mas. ‘Ta kiko mi mester hasi e ora ei ku mi reda i ku mi kanasternan?’ Broertje ta puntra su mes.

Masterplan
E desishon di Konseho di Minister ta enserá revishon di e masterplan eksistente pa desaroyá e área di Ref. Lo bai amplia esaki ku e área di Zakitó kaminda e planta di Aqualectra ta situá. E intenshon ta pa na momentu ku Aqualectra muda for di e sitio desaroyá e área aki den un zona turístiko ku hotèl i otro negoshinan. Ta kalkulá ku lo dura dos pa tres aña promé ku Aqualectra kaba di desmantelá e planta di awa kompletamente.

E haf di piskadó ta keda nèt enfrente di e planta di awa di Aqualectra i ta hopi kotisá pa desaroyo turístiko. E haf ounke ku e ta chikí ta disponé di un kibraola ku ta protehé e botonan i kasitanan di piskadó. Esaki ta dun’é un balor adishonal i ta hasié un área hopi atraktivo.

Piscadera no ta opshon
Muda pa un otro sitio manera por ehèmpel e haf di Piscadera no ta un opshon pa e piskadónan di Ref. Segun nan na Piscadera no tin sufisiente lugá pa tur e botonan i meskos ta konta pa e hafnan di piskadó ku ta keda parti pariba di brùg.

Komo reakshon riba e preokupashon di e piskadónan minister Steven Martina di Desaroyo Ekonómiko ta bisa ku lo bai konsulta ku e piskadónan di Ref i pidi nan input.

Minister Steven Martina den kòmbersashon ku José Manuel Dias

Sla duru
Den e plan di desaroyo mester garantisá ku e piskadónan ta mantené e aktual infrastruktura na Ref. Esaki ta opinion di e konosido sindikalista i piskadó Erwin Koenze. Banda di tin ku dil ku vandalismo i ladronisia di material e piskadónan no por permití ku ta kita nan lugá di mara boto tambe. ‘Esaki lo ta un sla duru pa e sektor di peska’, Koenze ta enfatisá. Ya kaba e piskadónan tin ku lucha hopi duru pa mantené kabes riba awa.