WILLEMSTAD – Sentenar di pashènt na Kòrsou ta usa zeta CBD, un ekstrakto legal di cannabis. Por haña e cannabidiol aki via botika. Eksperto di cannabis, Jeany Jansen ta boga pa legalisashon di cannabis puro, pasobra esaki lo ta mas efektivo serka enfermedat króniko. Inspekshon di Salubridat Públiko ta pro legalisashon.
Segun inspektor Jan Huurman mester legalisá cannabis na e mes manera ku esaki a sosodé na Hulanda kaba. “Esei ke men: bou di kondishonnan estrikto”, Huurman ta bisa. “Na Hulanda cannabis a keda kai bou di lei di opio, i esaki lo mester konta pa Kòrsou tambe.”
‘E lo mester ta optenibel solamente ku resèpt’- Inspektor Huurman
Inspektor di Salubridat Públiko Jan Huurman
Na Hulanda un botikario a haña pèrmit di prepará zeta ku THC (Tetrahydrocannabinol, e supstansia ku pone bo bai haltu. “Ta fásil pa traha regla pa esaki, e ora ei e ta sali riba e lista di remedi rekonosé i bou di kondishonnan estrikto un médiko por reset’é, e inspektor-general ta bisa. “Ke men hasié optenibel solamente ku resèpt.”
Jeany Jansen tin kanser i e ta bisa ku for di dia ku e ta usa cannabis e tumor den su pechu a bira mas chikí. “E ta stabil tres aña kaba.”
Cannabidiol di Spaña
Su konosementu di cannabis e ta kompartí ku kuatershen i piku pashènt na Kòrsou ku ta bin kumpra e zeta ku 5 porshento cannabidiol (CBD) serka dje. Mi ta importá e zeta aki for di Spaña. Ei nan ta tèst e den laboratorio. Asina mi sa sigur ku no tin nada otro agregá na dje.”
Bo no por bai haltu di zeta di CBD. “Pero bo mester sa si kon frekuente i kuantu bo ta us’é”, Jansen ta bisa. Mi ta atvertí mi klientenan ku nan no mester us’é den kombinashon ku terapia di chemo.”
‘Esnan ku us’é mester haña guia’- konosedó di Cannabis Jeany Jansen
Jansen ta haña ku tur usadó di cannabis médiko mester por haña guia. “Sigur si legalisá e zeta THC. Mi ta haña ku mester bini un plataforma pa cannabis na Kòrsou i ku ku mester envolví tur hende ku tin konosementu di e mata i e uso di e zeta den e legalisashon. Si nos tur koperá i kompartí nos konosementu, por hasi investigashon tambe i por yuda hopi mas hende. Tin diferente sorto di cannabis, diesshete den total. Kada sorto tin otro karakterístika.”
Jansen ta boga pa koperashon ku médikonan. “Pa mi por kompartí mi konosementu di trinta aña. Pasobra kua médiko na Kòrsou tin tinu di cannabis?”