Pòrtrèt: Peter Eikelenboom

WILLEMSTAD- Outoridatnan kompetente no tin hopi atenshon pa bario di Zwaan ku ta forma parti di Skalo. Zwaan ta pega na Scharlooweg na altura di “Dios Yudami” i ofisina di Defensor di Pueblo. Sint Jago ta e bario ku ta pega na dje pariba.

Ta biba entre setentisinku i shen hende den e bario. Tin hopi latino, pero no tur hende ta strañero, ademas tin algun drogadikto i hopi hende sin trabou. Mayoria di e kasnan ta di palu ku mester a haña un man di fèrf hopi aña pasá kaba. Tin kas sin bentana i sin fundeshi.

Un reportahe di Peter Eikelenboom

Hende ku djis tabatin nesesidat di un dak riba nan kabes a lanta e konstrukshonnan ilegal aki. Tres edifisio monumental den mal estado ta forma kurason di e bario. Un habitante di Zwaan ta kòrda ku den un di nan tabatin un sentro di prostitushon. Pero fo’i tempu ku kandela a destruí e no a hasi nada mas kuné .

Awendia ta drogadikto so ta sinta einan mei mei den e sushi i loke ta sobra di e murayanan ku a basha den otro. Zwaan no tin kaya asfaltá. Kaminda di tera ta trese stof i santu den e bario ora ta seku. Ora áwaseru kai algun parti ta bira manera laguna, molèster pa e habitantenan i foko pa sangura. Maske tin hopi problema den e bario, e habitantenan ta stim’é i no kier bai for di dje. Tirzah Libert ku awendia ta biba den e bario Sint Jago tabata biba den un di e kasnan monumental pa hopi ana. Ta su soño pa drecha bario di Zwaan.

E ta disgustá esnan ku ta akusá hulandes oropeo, e makambanan, di hòrta patrimonio for di yu di Kòrsou. Su lema ta: Tuma inisiativa i wak kiko bo mes por hasi. Huntu ku algun otro persona Libert a lanta e Fundashon Zwaan i Bisendario, ku e meta pa drecha e bario. Resientemente e fundashon a organisá un enkuentro ku e habitantenan pa enbolbí nan den plannan pa desaroyá e bario.

Nan empuhe ta sumamente importante. E habitantenan tin nan ideanan sigur. Un di nan kier mira ku FKP ta kuminsá konstruí kas den e bario, o mester por lo ménos drecha e kasnan eksistente di un manera ku e habitantenan por biba mas kómodo. Pero mester tin atenshon pa e problema di desempleo tambe. Un habitante ta sugerí pa desaroyá e pida di Zwaan pegá na Scharlooweg pa e bira un atrakshon turístiko.

Por traha artesania i bend’e ku turistanan. Si lanta proyektonan chikitu habitantenan por gana nan pan di kada dia. “Unidat di bario” tabata eksitoso ku su proyekto den Fleur de Marie, un otro parti di Skalo. Den algun aña a drecha e bario kompletu. Jeanette Juliet-Pablo ta positivo tokante e inisiativa pa desaroyá e bario .

Pero mester traha un plan konkreto si, pa enfrentá e problemanan den Zwaan. Su sugerensia ta kuminsá ku un bon enkuesta promé pa despues pone prioridatnan pa ataká e problemanan.