WILLEMSTAD – Tantu Inspekshon di Salubridat komo minister Suzy Camelia-Römer di Salubridat, Medio Ambiente i Naturalesa ta pro legalisashon di cannabis pa uso médiko. E pregunta ta ta ken lo bai kultivá e cannabis na Kòrsou pa e produkshon di zeta THC. Kuradó di yerba Dinah Veeris ta un di e proménan ku ta interesá abiertamente den kultivashon di mariwana.
“Nos mester warda te dia e bira legal, pa asina nos por pone e paso ei”, Veeris ta bisa. “Pero promé ku esei mester studia tambe. Bo mester sa kiko bo ta planta: Cannabis Sativa, òf Ruderalis. Tin mas sorto. Bo no por djis kuminsá planta anto bende, bo mester prepará bon.
Kòntròl
THC, abreviashon di Tetrahydrocannabinol, ta un supstansha siko-aktivo: Bo por bira haltu di dje. “Un grupo di hende na Kòrsou ta adiktá na dje. Tin mucha tambe ku ta adiktá na mariwana. Nos mester kòrda esaki si i regulá bon e uso di cannabis pa metanan médiko”, Veeris ta bisa. “Ora bo bai kultiv’é i produsí e zeta, bo mester sa tambe kuantu THC ta bai aden. Mester tin bon kòntròl di esaki.”
‘Zeta THC ta masha efektivo’
Veeris ta boga pa koperashon ku gobièrnu i un kampaña di informashon pa públiko. “Cannabis medisinal mundialmente ta un tópiko. Ta trata di un mata masha bieu, e tabata eksistí for di tres mil aña promé ku Kristu. Zeta THC por ta masha efektivo den trato di enfermedat grave, pero hende mester haña bon instrukshon kon nan mester us’é.”
‘Tin sufisiente prueba sientífiko pa efektividat di cannabis’- minister Camelia-Römer
Minister Suzy Camelia-Römer di Salubridat ta bisa di ta habrí pa legalisashon di cannabis. “Den koalishon mi a plantia si mester permití cannabis pa metanan medisinal òf nò. Si tin sufisiente sosten polítiko, lo desaroyá un prosedura kaminda lo deskribí e produkto i ku lo konektá kondishon na dje.”
Kura tradishonal
E minister ta bisa ku e ta konvensé di e bentahanan di cannabis. “Meskos ku mi ta konvensé di e benefisio di kura tradishonal, di nos yerbanan. Tin sufisiente prueba sientífiko pa e efektividat di cannabis.”
Inspektor-general Jan Huurman di Inspekshon di Salubridat tambe ta rekonosé ku na Kòrsou tin indikashon pa uso di cannabis. “Entre otro mucha ku epilepsia por tin probecho di zeta di cannabis.