ORANJESTAD – Den un òf dos luna Aruba lo finalisá e akuerdo tokante e fast ferry entre e islanan. I promé ku fin di aña e di dos akuerdo ku e operator aserka.
Asina e minister arubano di Transpòrt Chris Romero ta bisa. E ta konta ku e ferrty lo midi 120 meter, ku por transportá 800 persona ‘fasil’i 300 auto.
E kompania di barku spaño Fred Olsen Express añanan largu tabatin interes den un servisio di ferry entre e islanan. Tambe e kompania hulandes Waterbus i for di siman pasá tambe un kompania turko a mèldu, di kua ainda e minister no ke duna e nòmber.
Un biahe ta kosta ménos ku 100 florin
Un eksigensia importante ta ku e operadó ta invertí tambe den e fasilidatnan di haf. Pasobra gobièrnu ke invertí pero ta haña ku esaki lo no ta mas ku mei mión florin. Si nos mes invertí lo kosta gobièrnu sigur 10 bia mas ku si un kompania privá hasié”, e minister ta bisa ku siguransa.
E no ta ferwagt ku un pasashi lo kosta mas ku 100 florin pa persona: “Mi ta kere asta ku lo ta ménos.”
E islanan ta konta ku un rebibamentu di ekonomia ora habri e servisio di ferry. “Aktualmente transpòrt di container entre e islanan ta masha karu”, Romero ta bisa, kende tambe ta ferwagt ku e fast ferry lo alsa turismo riba tur dos isla.
Kiko e servisio di ferry lo nifiká pa e kompanianan lokal di aviashon, ku hopi bia ta pasa trabou pa mantené aviashon entre e islanan, e minister no sa ainda: “Nos no a sinta na mesa ku nan ainda. Lo bira un reto sigur pa e kompanianan aki. Pero e lo ofresé oportunidat tambe pa nan diversifiká nan servisionan.