KRALENDIJK – E plannan ku Kolegio Ehekutivo (BC, Bestuurscollege) a entregá serka sekretario di estado Raymond Knops tabata ‘desapuntante’. Asina e sekretario di estado a bisa despues di su bishita kòrtiku di djárason. E munisipio ekstraordinario no ta bai dilanti pa loke ta bon gobernashon, esei ta gabinete hulandes su opinion.
BC no ta masha desididu i mester kuminsá move atrobe. Na sèptèmber mester entregá un dokumento mihó pa bini na remarke pa sèn èkstra.
Prekupashon pa integridat
Poko tempu pasá kaba Knops a bisa den Tweede Kamer ku BC no a reakshoná sufisientemente riba un rapòrt di reshèrshi di Reino tokante situashonnan reprensibel den emishonnan di tereno. E tabata prekupá pa e integridat di Boneiru.
Na yanüari el a palabrá ku BC promé ku zomer lo a konsipiá un dokumento di maneho. Ku esaki gobièrnu insular via un akuerdo di maneho ku mester sera ainda lo por a demandá plaka èkstra di e asina yamá Ènvelòp di Region, kaminda a reservá 30 mion euro pa e munisipionan ekstraordinario Boneiru, Sint Eustatius i Saba (BES).
Sekretario di Estado Raymond Knops. Potrèt: Gijs van den Heuvel
Insufisiente
E kombersashonnan di djárason ku gezaghebber Edison Rijna, e tres diputadonan i Konseho Insular tabata positivo, Knops a bisa, pero el a aklará ku e no ta satisfecho. “Mi a bisa ku e progreso ta insufisiente, ku e no ta basta konkreto i ku mi ke subi e velosidat. Mi no ta haña ku mester usa e elekshonnan di Konseho Insular pa warda hopi plan pa te despues di mart 2019.”
Meskos ku na yanüari i den Tweede Kamer Knops djárason a enfatisá atrobe e importansha di bon gobernashon: “Bo mester realisá esaki mas lihé posibel.” Esei ta un kondishon pa por bini na remarke pa e sèn di e Envelòp di Region. E sekretario di estado ta dispuesto na duna sosten na e organisashon atministrativo pa realisá ‘maneho finansiero drechi i bon gobernashon.”
‘Hulanda a kometé eror’- Sekretario di Estado Knops’
Knops a bisa ku e ta realisá ku Hulanda a kometé eror den pasado. Ku e medidanan ku a anunsiá siman pasá pa kombatí pobresa, entre nan ònderstant mas haltu, e ta spera ku lo rekonstruí e relashon di konfiansa.
Sekretario di Estado Raymond Knops. Potrèt: Gijs van den Heuvel
Na sèptèmber Knops ta bini Boneiru atrobe, huntu ku kolega sekretario di estado Tamara van Ark di Asuntunan Sosial i Labor i minister Cora van Nieuwenhuizen di Infrastruktura i Maneho di Awa, pa papia tokante e plannan adaptá di maneho.
‘No tin tempu di pèrdè’
E meta ta pa na òktober firma e akuerdo di gobernashon: “No tin tempu di pèrdè. Mester tuma akshon awor.” Gezaghebber Rijna a bisa ku e lo empeñá pa logra e meta aki.