Pòrtrèt: Roelie van Beek

WILLEMSTAD – Polis a taha hóreka di Nieuwstraat na Pietermaai di laga banda toka. Opheshon di doñonan di kafé ku pèrmit pa muzik live no a yuda nada. “Polis a menasá di revoká e pèrmit si e banda toka”, Wim Boereveen di Mundo Bizarro ta bisa.

E públiko amante di salsa djaweps pasá a bini Mundo Bizarro pòrnada pa e nochi kubano di tur siman. Na delaster momento a kanselá e banda. Dos konga tabata pará manera testigu silensioso riba e dansflur bashí, algun kliente a sinta na bar.

Banda di Mundo Bizarro e prohibishon ta na vigor tambe pa e otro lugánan di hóreka den Nieuwstraat, meskos ku pa Bar 27 na Waaigat.

Pèrmit
“Nos tin e mes pèrmit ku Mundo Bizarro”, doño Robbie Nieuwpoort ta bisa. “Bar 27 for di tres aña i mei ta un podio pa banda lokal. Si nos ke pa un artista internashonal bin toka, nos mester pidi un pèrmit separá p’esaki. I asina nos ta hasi tambe.”

No ta kla ken ta responsabel pa e medida di prohibishon i e menasa di revokashon di e pèrmit di restorant: ora puntra polis ta referí na MEO (Ministerio di Desaroyo Ekonómiko), i MEO na su turno ta referí na polis.

Molèster di boroto
Habitantenan den besindario lo a keha serka polis tokante molèster di boroto. Un habitante di e edifisionan di apartamento na Waaigat ta mustra un paki di formulario ku polis a parti pa e habitantenan. Un di e dokumentonan ta pa duna keho. “Mi no a yena nada pasobra mi no tin molèster”, e dama ku ke keda anónimo ta bisa.

Su bisiña ta indiká, ku ta e a organisá e akshon. “Mi a wanta hopi di Mundo Bizarro, pero awor ta basta. Mi ta hartá di tur hóreka den e kaya aki.” E tambe ke keda anónimo.

Bosero di polis Imro Zwerwer a primintí ku e lo investigá ta bou di ken su òrdu a saka e prosès-verbal. Boereveen ta kontemplá di tuma paso hurídiko