Pòrtrèt: Gunter Seraus

KRALENDIJK – Aktualmente greis i santu no ta optenibel na Boneiru. Por kumpra semènt na un preis mas haltu. Esaki ta pa motibu i e seramentu ‘repentino’ di Zuidpier, ku ta adekuá pa e tipo di merkansia na granèl aki.

Gunter Seraus den kòmbersashon ku Ronald Muyden

E motibu ta ku a sufri un tardansa den e renobashon di e pir aki. Despues di un karta hopi urgente di Kámara di Komèrsio Boneiru (KvK) na gezaghebber Edison Rijna, kende alabes ta e presidente di e grupo di direkshon di Desaroyo Haf di Laman di Boneiru, siman pasá a yega na un solushon intermedio pa e usadónan di haf. Di 28 di yüli te ku 6 di ougùstùs pa un temporada kòrtiku greis i santu por yega via Zuidpier.

Solushon temporario
Ronald Haafkes di Haafkes Bouw Bonaire a sobra greis i santu pa dos siman mas pa un proyekto di un parke di vakashon. P’esei e ta kontentu ku e pir lo habri pa un siman i e ta aliviá tambe ku e no tin nodi di manda 60 trahadó freelance kas pasobra no tin material di konstrukshon.

Huisio sumario
Pa motibu di e anunsio den medionan di komunikashon riba 13 di yüni Stone Crusher N.V., un di e importadónan di mas grandi di produkto na granèl na Boneiru, a trata pa via korte laga Entidat Públiko Boneiru para e trabou di drechamentu na Zuidpier temporariamente pa e karganan ku el a bestèl. Korte a deklará e kompania ‘no reseptivo den su demanda’.

For di yanüari e N.V. tabata sa ku no por a usa e pir for di 30 di aprel (den realidat esaki a bira 30 di mei) te 20 di yüli pa produkto na granèl. “Havenkantoor diferente bia a bisa stakeholders pa bestèl produkto èkstra pa por pasa e temporada kaminda e produktonan no por a yega”, segun havenmeester Günther Flanegin.

Oumentu di preis
E karga di produkto na granèl ku Stone Crusher N.V. a ferwagt e tempu ei, na e pir Waf Juan Francisco (Chicu) Mercelina, for di e barku di produkto na granèl por a pasa pa un barku mas chikí riba laman mes serka Middenpier (Waf di Duana). Na Zuidpier lo por a realisá esaki den mas o ménos seis ora. Awor tabatin mester di dos dia, Herbert de Jongh, manager di Stone Crusher N.V., ta bisa.

Preis di material di konstrukshon. Potrèt Ronald A. Muyden

Esaki a pone ku su preisnan a subi di $227,- pa $245,- pa meter kúbiko. No ta solamente kompania (di konstrukshon) ta ripará un oumento di preis. Tin un otro kompania ku tambe ta importá semènt via container. Pa motibu di e sistema aki di baha karga Kooyman Bonaire pa motibu di e gastunan haltu di transpòrt temporariamente mester a subi preis di nan sakunan di semènt di $4,25 pa $4,75.

Sin entrada
Di e dies trahadónan na Wilca N.V. di direktor Gunter Seraus, e sinku trahadónan ku no ta den empleo fiho ta na kas. Pa e otro sinku tin sufisiente trabou di mantenshon di mashin pa kubri e skarsedat aktual di material di konstrukshon. “Nos ta pará ketu un luna. Nos no por entregá ni betòn ni blòki. Mi ta kere tin kompania ku a manda mas freelancer kas”, segun Seraus.

Gunter Seraus, direktor di Wilca N.V.. Potrèt Ronald A, Muyden

Kámara di Komersio ta ‘masha prekupá’ pa entre otro e ‘retiro di hopi trahadó’. Segun Kamara di Komersio di Boneiru 15 porshento di e poblashon trahadó ta traha den e sektor di konstrukshon. Esaki ta mas o ménos 1500 trahadó.