WILLEMSTAD – Mester mehorá e infrastruktura pa esnan ku ta praktiká e deporte di kana i kore, pero outomobilistanan tambe mester kore ku mas koutela na momento ku nan mira un òf mas persona ku ta kana òf kore kantu di kaminda. Esei di akuerdo ku Glenn McDonald, miembro di Road Runners Club Kòrsou, kende ya ta praktiká e deporte pa mas di 50 aña kaba.
Glenn McDonald den kòmbersashon ku Ramon Yung
Road Runners Club Kòrsou dia 4 di ougùstùs a konmemorá tres miembro, Kristen Leyba, Elton Montesant i Monique van Meerwijk, kendenan sinku aña pasá a fayesé den un aksidente trágiko riba Helmin Wiels Boulevard, momento ku nan tabata partisipá na un rekoudashon di fondo ku RRCK a organisá pa patvenderei.
Riba e foto, momento ku famia, amigu i miembronan di RRCK a konmemorá sinku aña dje aksidente fatal den kual tres miembro dje organisashon a pèrdè nan bida. Pòrtrèt: Ramon Yung
Jero William, un bon amigu di Elton Montesant kende a pèrdè su bida durante e aksidente trágiko ta kòrda manera ta ayera ku e aksidente aki a sosodé. Dia dje aksidente el a bai buska Elton na su kas, pa despues nan sali bai e kaminata. Na altura di Floris Suite, Elton a kansa i konsekuentemente el a bisa Jero pa sigui kore i e lo sigui kana pa despues bolbe topa kun’é. Lamentablemente na altura dje rotònde di Betto Adriana, Elton a hañ’é enbolbí den e aksidente lamentabel.
Sinku aña despues, Jero William ta kere ku no a bin kambio den komportashon di outomobilistanan pa ku esnan ku ta kana i kore, pasó e kastigu ku a imponé den e kaso aki mes tabata insignifikante. Pues outomobilistanan lo mantené e mésun aktitut iresponsabel aki.
Jero William den kòmbersashon ku Ramon Yung
Apesar dje aksidente aki ku a kosta bida di 3 miembro dje organisashon, Glenn McDonald, un otro miembro di RRCK, ta di opinion ku entre otro mester drecha alseranan aki na Kòrsou, di manera ku esnan ku ta praktiká e deporte di kana i kore, por tin un mihó infrastruktura pa nan por hasi uso di dje. El a splika ku hopi dje alseranan aki na Kòrsou no ta pareu, o sea nan tin buraku òf ta sak aki aya. Esaki por kousa leshon na pia di e persona ku ta kana òf kore, si e no paga bon tinu riba e superfisie.
Mas aleu Glenn McDonald ta kere ku komportashon di outomobilistanan tambe ta laga hopi di deseá, loke ta pone ku for di momento ku un persona ta sali su kas pa bai kana òf kore, su bida ta na peliger. P’esei e ta hasi un yamada na outomobilistanan pa kore ku mas koutela i tene kuenta ku esnan ku ta praktiká deporte di kana i kore.