WILLEMSTAD – Seguridat dia i nochi, tualèt, hürmentu di stul di playa i asta un mirador. Lo bai manehá ocho playa públiko na Kòrsou pa hasi esakinan espesialmente mas seif i pone fasilidat. E diseño pa e promé playa, Caracasbaai, ta kla kaba.
Curaçao Touristen Bureau (CTB) aña pasá a tuma ofer maneho di ocho playa públiko: Caracasbaai, Daiboi, Santa Krus, Lagun, Kenepa Grandi, Kenepa Chikí, Zjeremí, i Playa Fòrti.
E playanan aki ta haña vigilansia, lugá di parker vigilá, un edifisio ku tualèt, ducha i lugá di troka paña, un bar i restorant i hürmentu di stul di playa, kayak i mas kos si ta na CTB. Esaki ta bai kosta un mion florin pa playa.
“Nos ke duna empresario lokal e oportunidat pa ofresé servisio na nos playanan, meskos ku na otro kaminda den e region kaminda ta hende lokal ta sirbi bo”, Hugo Clarinda, direktor suplente di CTB, ta bisa.
“Di e eksplotadónan di hóreka na e playanan, hürdo di stul di playa i hende ku ta ofresé aktividat di deporte di laman, nos lo pidi un kontribushon finansiero pa e seguridat. Na promé lugá ta keda ku e playanan ta keda aksesibel grátis pa públiko”, Clarinda ta bisa.
‘Mi a proponé pa usa drone den vigilansha’ – Raichel Martina
Arkitekto tékniko Raichel Martina (32) poko tempu ei a ofresé su plan pa Caracasbaai na minister di Desaroyo Ekonómiko Steven Martina (MAN). ‘Nan a aprobá mi plan.”
Parti di su plan ta un toren di mirador grandi ku un left pa bishitante di laman ku hèndikèp òf di edat haltu. “For di e toren bo tin bista riba Spaanse Water, Tafelberg, e península di Caracasbaai i laman.”
Na e playa lo bini un ofisina di polis di turista Politur i lo tin vigilansha na e playa 24/7 Martina ta sigui konta. “Mi a proponé pa usa drone den vigilansha, i pa pone panel solar na e bar i e restorant pa generá elektrisidat duradero.”
Martina ta bisa ku el a haña e idea pa mehorá e playanan ora e tabata studia arkitektura tékniko. “Promé mi a pensa riba Zjeremí, popular serka yu di Kòrsou.” Martina tabata kunsumí riba shushi i karbon di alaparia tirá den santu.
“Si tabatin fasilidat i sufisiente seguridat un kos asina no ta sosodé. Nos pueblo meresé di bai un playa limpi i keda ei anochi tambe sin peliger.”
‘No muchu karu’ – Gian Tramm
Na e playa di Caracasbaai kaminda ta espesialmente hende lokal ta bini, ainda e plannan no ta konosí. Gian Tramm ta bisa ku mester di mas fasilidat i e ta dispuesto di paga pa nan tambe. “50 sèn òf un florin. Pero no ku mi mester paga 10 florin pa por yega na e playa aki.”
Mataniel Nahr tambe ta bisa ku e ta pro, espesialmente pa e seguridat. “E ora ei bo ta sigur ku bo por laga bo outo i disfrutá di e playa.”