WESTPUNT – Un playa yen di outo, un pir yen di turista, un laman yen di hende ta snòrkel. Playa Piskadó den wèst di Kòrsou ta birando un sitio turístiko popular, pero no ta tur hende ta kontentu ku esaki.
Es ku awendia ke kumpra piská fresku serka piskadó lokal apénas por pone su outo na e playa. Doño lokal Roy Gouverneur di e restorant ‘Sabor di Playa Westpunt’ tambe tin molèster di esaki.
E ta indiká ku su klientenan no por pone nan outo serka di su restorant. Tur lugá di parker ta okupá pa turista. “Mayoria di mi klientenan ta hende lokal di aki banda. Awor nan mester parker te riba kaya, esei no ta bon pa mi negoshi”, segun Gouverneur.
‘Peliger di bida’
Un grupo chikí di piskadó ta sinta den sombra ta wak loke ta pasando riba e pir. Un boto chikí di piskadó ta bini bèk i ta trata di buska su kaminda den e multitut di hende den laman, pa e por mara su boto seif na e pir. “E turistanan ta asina di fókùs riba e turtuganan ku nan no ta paga tinu ora un boto yega. Esei no solamente ta un molèster pa e piskadó, sino esaki por trese sirkunstansha peligroso pa e turistanan”, segun un di e piskadónan.
Kresementu ekonómiko
E situashon ta trese posibilidat tambe. “Hopi hóben na Westpunt no ta bai skol mas. Desaroyo turístiko na e playanan ta duna nan e oportunidat pa tòg gana algu, por ehèmpel si nan bende kos ku turista”, un otro piskadó ta bisa.
Empresario lokal Jairo Schermer for di poko dia ta gana su plaka ku e desaroyonan na e playa. “For di dos luna nos tin tur pèrmit pa hür stul di playa i parasòl na e playa. Asina e turistanan ta keda na e playa mas largu i nan ta gasta mas sèn. Nan ta kumpra kos di bebe serka e empresarionan lokal i piská serka e piskadónan. Solamente ora e bùsnan grandi di turista bini aki ta bira masha kaótiko, mester organisá esaki.”
Turtuga
Segun Sabine Berendse di Sea Turtle Conservation Curaçao e turtuganan ta víktima. “E turistanan ta bai landa riba nan, di moda ku nan no por bini ariba trankil pa nan hala rosea.. Tambe tur dia nos ta haña imágen di hende ku ta mishi ku e turtuganan i kue nan tene.”
Jairo tin su propio solushon p’ésaki: “Mi ta bisa tur hende ku hür serka mi ku nan no tin mag di mishi ku e turtuganan.” E tin pensá pa pone esaki riba papel i duna e turistanan esaki. Pa pone mas énfasis den su relato el a yega di bisa ku bo por bira malu si bo mishi ku un turtuga, “pero naturalmente esaki no ta bèrdat.”