WILLEMSTAD – Kuater luna pasá tabatin hopi atenshon pa nan; e seis famianan ku for di nesesidat a bai biba den un skol na Steenrijk. Medionan di komunikashon, ámtenar i polítiko ku a bin tira un bista a yama e situashon deplorabel. Pero nada no a kambia, supervisor Shirley Adamus ta bisa. “Niun di e habitantenan no a haña kas.”
E total di 22 adulto i mucha ta inskribí serka Fundashon Kas Popular (FKP), tin di nan mas ku diesdos aña kaba. Nan no tin bista riba un kas. E lista di espera di FKP tin mas ku 9 mil nòmber.
Kada aña FKP ta entregá 100 pa 150 kas nobo, no ta sufisiente pa duna ni sikiera hende ku urgensia médiko òf sosial un kas.
Supsidio di hür
Tòg t’asina ku na mod’é papia seis famia por haña yabi mayan pa un apartamento na Moontjeweg den Savaan, direktor di FKP Arthur Con ta bisa. “Pero e ora ei gobièrnu mester duna supsidio di hür. FKP tin añanan largu kaba ta avansá e supsidio ei, i finansieramente no por hèndel esaki mas. Awor ta turno di ministerio di DSLB.
Pòrtrèt: Roelie van Beek
FKP a ofresé gobièrnu un preis bahá di hür pa e 25 kasnan na Moontjeweg ku ta reservá pa kasonan urgente. “E solushon t’ei”, Con ta bisa. “Ministerio a bisa ku nan lo hasi algu, ta esei nos ta warda.”
Den e tres añanan ku tin hende ta biba den e skol a nase dos baby, Shirley Adamus ku ta guia e famianan ku nesesidat di ayudo ta konta. Den un di e klasnan el a habri un bazar di artíkulo di segunda mano, di e chipichipi ku ta gana pa dia ku esaki nan ta hasi kompra. “Mester yena barika promé”, Adamus ta bisa. “E mayornan ku tin trabou ta koperá manera nan por, ounke tin bia no ta mas ku dies florin.”
Pòrtrèt: Roelie van Beek
Un di e señoranan ku ta biba ei tin difikultat pa yega na e ducha, ya ta nuebe luna ku e tin un pacemaker pa su kurason, i resientemente el a haña un sangramentu serebral chikí. E tin 44 aña, mama di un yu muhé di 16 aña; nan mester kompartí un kama, mas kama no tin.
Famia number seis – tata, mama i dos yu – ta ministerio di DSLB a pone nan den e skol, sin niun kontribushon finansiero di gobièrnu.
“Ki mi ke hasi?”, Adamus ta suspirá. No por nenga e hendenan aki, pasobra ta unda otro nan por bai? Ma mi tin masha gana di sa si kiko gobièrnu ta bai hasi, si nan ta bini ku un solushon. Nunka no tabata e intenshon pa biba hopi tempu den e skol bandoná aki. Pero ta manera no tin un fin na e situashon di emergensia aki.