WILLEMSTAD – Gobièrnu di Kòrsou debe e fundashon di konstrukshon di kas pa pueblo (FKP) 100 mion florin na supsidio di hür. Esaki College Financieel Toezicht (CfT) ta konfirmá, direktor di FKP Arthur Con ta bisa. “Mi ta masha kontentu ku awor CfT ta insistí riba pago serka gobièrnu.”
E fundashon di kas, ku pa gobièrnu ta manehá 3500 kas, no por keda adelantá e supsidio di hür pa gobièrnu. “Nos tin diesocho aña kaba ta hasi esaki”, Con ta bisa. “Tur aña esaki ta kosta nos mas ku sinku mion florin. Pa FKP ‘sinku pa diesdos a bati’, e direktor ta enfatisá. “Gobièrnu mester kòmakròs awor.”
‘Nos ta mira e lista ku 9 mil hende ku ta buska kas sigui krese’
FKP tin un seri di reto. E fundashon ta warda emishon di tereno pa kas sosial, ta dependé di gobièrnu pa infrastruktura, mester fia na un interes di hipotek basta haltu di moda ku e preis di hür ta sali mas haltu ku a deseá, tur aña por entregá solamente 60 pa 80 kas nobo i ta mira e lista di 9 mil hende ku ta buska kas sigui krese. Segun direktor Con tin un kousa komun: Pais Kòrsou no tin un maneho di bibienda públiko.
For di lantamentu di e fundashon pa kas kuarenta aña pasá, FKP ta warda un akuerdo di maneho ku gobièrnu a akordá. Kaminda te awe gobièrnu ta representá den maneho di e fundashon, no ta eksistí un akuerdo formal pa FKP manehá i eksplotá propiedat inmóbil.
Tin hende tin binti aña kaba ta warda un kas. Esei ta inaseptabel!
Domeinbeheer ta preferá duna tereno na persona privá ku na FKP, Con ta bisa. “Esei ta komprendibel, persona privá ta paga impuesto di èrfpagt.” Si duna FKP tereno esei no ta trese plaka pa gobièrnu.”
Tanten gobièrnu no bini ku un maneho pa bibienda popular, e skarsedat pa kas sosial lo sigui eksistí, Con ta premirá. “Tin hende tin binti aña kaba ta warda un kas. Esei ta inaseptabel.”
Urgente
Di e 9 mil hendenan riba e lista di espera dies porshento ta urgente, a base di un deklarashon médiko, sirkunstanshanan sosial òf e estado deplorabel di e kaminda ku nan ta biba aktualmente. “Hopi di e hendenan aki no por paga hür, pa nan supsidio di gobièrnu ta nesesario. P’esei gabinete mester traha un maneho p’esaki.”
E diesun kasnan pa hende ku un limitashon físiko ku FKP a laga traha na Santa Rosa, ta un ehèmpel pa konstrukshonnan asina den otro bario. “Ta kosta mas pa traha kas asina, esei tambe mester di un maneho di gobièrnu.”
E desaroyo di Wechi parsialmente ta solushoná e skarsedat di kas. Den e área dilanti e bario Gato, di e rotònde di Zegu te na Malpais, masha rápido mes a lanta e promé apartamentonan i kasnan na rei, di e 4500 ku lo bini. “Danki na sistema di konstrukshon nobo i duradero por realisá e kasnan kumbiniente i espesialmente rápido”, Con ta bisa.
Oostpunt
Awor FKP ta wak Oostpunt tambe. Danki na un dil di èks diputado di Infrastruktura Anthony Godett ku doño di tereno Willy Maal, nuebe aña pasá gobièrnu a haña 75 hèktar na Oostpunt pa kas sosial. “Nos ke traha dos mil apartamentu ei”, Con ta bisa. “Pero pa esei ta konta: promé gobièrnu mester regla e asuntu di supsidio di hür.”