Pòrtrèt: Pixabay

WILLEMSTAD – Según VENEX, e asosiashon ku ta sali pa derechonan di venezolano na Kòrsou, “nada no a kambia” despues di e enkuentro informativo ku Minister di Hustisia, Quincy Girigorie, a organisá na plenchi Wilhelmina. Ombudsman tambe a saka un rapòrt devastador resientemente, kaminda ta tilda ministerio di hustisia di implementashon di un maneho di asilo defisiente. Na mart último, Nashonnan Uni ofisialmente a deklará e situashon na Venezuela komo un krísis humanitario.

Ana Madero,Mary Goiri i Jennifer Sifontes di Venex den kòmbersashon ku Deya Mensche

VENEX a akusá e departamento di imigrashon di deportá spesífikamente e venezolano ilegal promé ku esaki por apelá pa asilo polítiko i no ta duna nan akseso na un abogado òf representante legal. Segun Ombudsman Keursly Concincion, esaki ta bai kontra di artíkulo 3 di EVRM, kaminda ta prohibí di deportá e personanan akí sin ku UNHCR tabata envolví ku e tratamentu di nan petishon.

E meta di e enkuentro na yüni, asistí pa diferente representante di imigrashon, polis i DBB, tabata pa informá pueblo i imigrante riba e prosedura i desaroyonan pa ku imigrashon pa nos pais i e ahustenan ku minister Girigorie a introdusí mirando e situashon prekario na Venezuela.

Spesífikamente minister Girigorie a splika ku ya nan a introdusí algun fleksibilidat pa e grupo di venezolano ku tin difikultat pa renobá nan pasport of yega na papelnan ofisial manera un akto di nasementu òf karta di bon kondukta. Tambe minister Girigorie a instalá algun luna pasa un grupo interdimenshonal ministerial kual mester analisá i delineá e maneho di asilo mas pronto posibel.

VENEX ta kontentu ku Ombudsman a fiha su posishon pa ku e situashon. Jennifer Sifontes ta lamentá ku esaki a bini despues ku a deportá hopi venezolano sin kontemplashon, manera e situashon ku e señora ku nan a buska su yunan na skol pa deportá nan. VENEX a entregá un karta na mart último na minister Girigorie, sitando vários punto pa ku e situashon alarmante di e venezolanonan, pero ainda e organisashon humanitario no a haña un kontesta.

Segun Mary Goiri, VENEX tin mas ku un aña ta tende promesa i ta spera ku awó si ta deliniá i apliká e prosedura di detenshon. “Esaki no mester bira un guera entre Hulanda i Kòrsou pa ken mester tuma rienda di e situashon prekario ku e venezolanonan ta enfrentá na Kòrsou”, el a splika.

Kaso Mauricio
Un ehèmpel aktual ta e kaso di e militar Mauricio di 19 aña di edat, ku a hui fo’i Venezuela despues ku e no kièr a forma partí mas di e Guardia Nashonal enkabesá pa presidente Maduro. El a entregá su retiru, pero su superiornan, kende a busk’é pa desertashon, a ninga esaki. Temiendo pa su bida, Mauricio a tuma e desishon difísil pa bandoná Venezuela riba un lancha ku rumbo pa Kòrsou. Na su yegada na Kòrsou, a detené Mauricio i traslad’é pa SDKK, ku a start e prosedura di deportashon.

Despues di vários intento pa komuniká su situashon na outoridatnan, Mauricio a drenta den kontakto ku abogado Achim Henriquez, kende a trese su kaso na atenshon di prensa i outoridatnan. Segun leinan di Kòrsou i reino hulandes, Mauricio tin derecho pa trata i evaluá su petishon, despues di konsiderá e peliger ku e lo kore si deport’é sin konsiderashon pa Venezuela. Ainda Minister Girigorie no a reakshoná ni riba e rapòrt di Ombudsman ni riba e situashon di Mauricio.