KRALENDIJK – Fin di òktober akí e akuerdo di gobernashon di Boneiru lo ta kla pa firma. Esaki gezaghèber Edison Rijna ta duna di konosé durante un momento pa prensa en konekshon ku un bishita di trabou di sekretario di estado Raymond Knops na e munisipio ekstraordinario di Hulanda.
“E intenshon di e akuerdo di gobernashon akí ta, ku tantu e Kolegio Ehekutivo, e Konseho Insular komo e Reino ta hasi palabrashonnan konhunto riba ken ta hasi kiko i ku ta mara esei na tempu.” Ta for di yanüari ta trahando riba e dokumento di nuebe punto, ku tópikonan manera, entre otro, bon gobernashon, maneho finansiero i infrastruktura.
Gezaghèber Edison Rijna
Na e último bishita di trabou di e mandatario, eksaktamente dos luna pasá, Knops a haña e plannan ku e Kolegio Ehekutivo (‘BC’) a entregu’é ‘desepshonante’. Riba 4 di sèptèmber e sekretario di estado pa Asuntunan Interior i di Reino (‘BZK’) a haña e último vershon di e dokumentonan akí mientras ku e Konseho Insular ‘no tabata sa di e dokumentonan ainda i nos tabata den kombersashon ainda’.
‘Nos ta mantené e spit’
Otro siman BZK lo duna su komentario riba esaki, pa e Konseho Insular por trat’é i pa por firm’é na fin di òktober. “Nos ta mantené e spit, pasobra mas pronto posibel – i e boluntat ei tei na tur dos banda – nos ke yega na un akuerdo,” segun Knops.
Knops ta skohe pa adaptashon di lei ‘si resultá ku esaki ta primi’. Su promé meta ta pa ‘realisá asuntunan’ den e kuadro di lei eksistente.
Kontrali na e bishita den yüli, e biaha akí Knops a papia ku e BC kompleto, konsistiendo di e gezaghèber, tres diputado i un sekretario. Den un kombersashon ku e Konseho Insular, ku ta konta nuebe kabes, e mandatario di BZK a papia tambe di entre otro e ènvelòp pa e Region, un karta tokante pobresa kresiente i e mínimo ku ta nesesario pa por sobrebibí.
Un bishita na e terminal di zeta Bopec i un kombersashon ku representantenan di e organisashon pa konsumidó, tambe a forma parti di bishita akí. Knops a eksperensiá esakinan komo kombersashonnan konstruktivo i habrí.
Gezaghèber Rijna ta papia di un ‘tendensia positivo’ den entre otro e kolaborashon durante e tres bishitanan último di e mandatario na Boneiru.
‘Mi no sa balia’
Knops a papia ku e BC i ku e Konseho Insular di Saba ku tabata presente pa Dia di Boneiru. Ta selebrá esaki tur 6 di sèptèmber. Riba e pregunta, ta kon el a prepará pa esaki, e ta kontestá: “Mi no a prepará p’ esaki. Mi no sa balia.”
Djaweps e sekretario di Estado a selebrá un parti di Dia di Boneiru i el a finalisá su bishita di trabou di kuater dia na Sint-Maarten, Sint-Eustatius i Boneiru.