Pòrtrèt: Fundashon Kontakto

WILLEMSTAD – Ainda no tin aseptashon pa persona ku limitashon mental na Kòrsou. Nan posibilidat pa haña un trabou ta minimal. Despues di presentá e personanan aki, i tambe nan habilidatnan, kuater bia na komunidat, Fundashon Kontakto ta konkluí ku ainda tin un kaminda largu pa kana. E siman aki tabatin e di sinku ‘Day on the Job, Yes I Can !’, ku Fundashon Kontakto ta organisá un bia pa aña.

Taizy Goeloe, terapeuta di trabou a splika ku riba e dia aki tur kliente ta sali for di Fundashon Kontakto i bai traha na un empresa di 9 or di mainta pa 12 or, bou di supervishon.

Dulce Koopman a traha e siguiente reportahe, algu promé ku e klientenan a bandoná Fundashon Kontakto pa bai traha

Taizy Goeloe a menshoná tambe ku komunidat mester bira mas konsiente i komprondé e persona ku desabilidat mental. Tambe mester tin e konosementu kon pa trata e persona ku limitashon mental, ora ku e ta na su trabou.

Taizy Goeloem terapeuta di trabou Fundashon Kontakto. Pòrtrèt: Dulce Koopman

E proyekto ‘Day on the Job’, di e forma grandi ku Fundashon Kontakto a organis’é durante di 5 aña, ta bai sigui riba un eskala mas chikí. Taizy Goeloe: “Lider di e gruponan mes lo indiká na unda nan tin deseo di bai pa siña nan kliente algu”.

Fundashon Kontakto ta aktivo riba e tereno di training, formashon i guia. Den e kuadro aki, pasobra e Fundashon tin kontakto ku hopi empresa, den futuro gruponan chikí individualmente lo bai un ‘Day on the Job’, serka e empresanan konserní.