Pòrtrèt: Jacqueline Hooftman

WILLEMSTAD – Na Kòrsou no tur hende ku mester di kuido médiko por haña esaki tambe. Pa motibunan finansiero tin sierto tratamentu ku no por hasi na hòspital Sint Elisabeth (Sehos). Te aworakí ta trata di eksepshon, pero e situashon por surgi ku lo pone un máksimo na e tratonan médiko di mas karu den e hòspital.

E produkshon di Sehos anualmente ta konsistí di 1.6 mion aktividat médiko. Komo úniko hòspital ku un departamento di ayudo urgente Sehos ta disponé di un bùdjèt anual di 124 mion florin. E bùdjèt di kuido aki di gobièrnu no ta sufisiente.

E tratamentunan médiko di mas karu ta operashonnan di hep, terapia di kanser, trato di enfermedat di kurason i ader i kuido di pashènt ku aids. E státùs finansiero di e hòspital hopi bia kaba a kousa ku e stòk di remedi pa sierto grupo di pashènt no ta sufisiente i ku mester posponé operashon, den algun kaso pa un tempu indeterminá.

‘Tur aña tin un défisit struktural di 15 mion florin’ – Anthon Casperson

“Pa e hòspital por funshoná na un manera drechi mester di 139 mion florin tur aña”, Anthon Casperson, direktor di Asuntunan General di Hòspital Sint Elisabeth, ta bisa. “Pa e hòspital nobo tambe ta konta ku e kuido i trato ei ta kosta mas o ménos 140 mion pa aña. Esei ke men ku strukturalmente tin un défisit di 15 mion florin.”

Anthon Casperson, direktor Asuntunan General di Hòspital Sint Elisabeth. Potrèt: Jacqueline Hooftman

Pero e pedido pa kuido médiko ta oumentá, entre otro pa motibu di enbehesimentu, i ta bira mas kompliká tambe. “Hende ta bira mas bieu, hopi bia tin diferente malesa i e petishon di kuido asina ta bira mas kompliká”, Casperson ta bisa. “Ta bini aserka ku hòspital mester duna mas asistensia urgente. Víktimanan di violensia, aksidente den tráfiko i otro aksidente, na Promé Asistensia mas i mas hende heridá i ku afektashon agudo ta drenta.”

E petishon pa kuido médiko ta mas grandi ku e bùdjèt di kuido. Hòspital mester nenga sierto trato spesialista pa motibunan finansiero. Tin e menasa ku lo bai pone un límite na trato ku ta mas komun manera operashon di hep tambe.

‘Komo prinsipio nos no por ninga kuido’ – Anthon Casperson

“Mi ta haña ku komo ehekutivo di hòspital mi no por husga tokante esaki”, Casperson ta bisa. “Hòspital tin un ròl di fasilitá, na prinsipio nos no por nenga kuido. Awor ta presentá e dilema na e seguradó di kuido i na gobièrnu. Ta nan mester tuma e desishonnan.

Diskushon sosial
Segun e mandatario komunidat tin e último palabra. “Mester bini un diskushon sosial amplio tokante e pregunta di ki tipo di kuido Kòrsou mester tin. E diskushon aki bon mirá mester a tuma lugá masha dia, ta na interes di nos tur ku tin klaridat i ku kuido den nos pais ta keda aksesibel.