WILLEMSTAD – Desena di kunukero na Kòrsou añanan largu kaba ta traha riba tereno di gobièrnu, sin ku nan tin pèrmit p’esaki. Mayoria di nan a entregá un petishon na Domeinbeheer si.
Luberisse Celestin si a pidi un pèrmit na 2012 i seis aña despues el a risibí pèrmit ofishal pa planta na un tereno banda di Dam Pretu, ku el a traha ‘riba tur e tempu. “Ami ta djis un di hopi hende aki. Mayoria di nan ainda ta wardando nan pèrmit.”
Na Domeinbeheer ya pa añanan e kantidat di petishonnan pa un pida tereno pa agrikultura òf krio di bestia ta akumulando. Ministernan Zita Jesus-Leito (PAR) di Tráfiko, Transportashon i Planifikashon Espasial i Suzy Camelia-Römer (PIN) di Salubridat, Medio Ambiente i Naturalesa poko tempu ei a bisa ku nan lo pone man na obra pa kita e retraso den e trato di e petishonnan. “Ta masha importante pa nos por kultivá nos mes bèrdura i fruta”, segun minister Camelia-Römer.
‘Bo ta skohe pida tereno, bo ta kuminsá sembra’- kunukero Luberisse Celestin
Fot di Dam Pretu, den besindario di plantashi di Aloë, den henter e área por mira oasis bèrdè den un área ku banda di esaki ta brutu i seku. Na diferente lugá a basha shushi di kos di kas. Bientu ta plama holo stinki di bestia morto. “Nos ta limpia hopi di e shushedat, pero ora ora asina atrobe a basha un trùk yen di shushi dilanti mi pat,” Celestin ta bisa, miéntras e ta para mei mei di rei di mata haltura di su rudianan.
Shen meter mas leu un hende ta kita mondi riba un tereno ku un loader. “Asina tur hende aki a kuminsá”, Celestin ta bisa. Bo ta skohe pida tereno bo ta kuminsá sembra. Si ainda bo no tin plaka pa un pos di awa bo ta kumpra awa serka e otro kunukeronan.”
Kunukero Celestin riba su tereno – potrèt: Roelie van Beek
Riba e Dam tin un pikòp ta kore ku bari blou grandi ku awa ta pasa e rantnan di e barínan asina e trùk pasa riba un bònkònkò riba kaminda. Celestin tin un pos di awa ku mulina i tanki pa añanan kaba. Esaki a kost’é dies mil florin, plaka ku el a gana ku benta di su kosecha ku supermerkado lokal.
‘Hopi kampesino ta keda bou di radar’ – eksperto di agrikultura Stanley Marks
Segun eksperto di agrikultura Stanley Marks, ku ta traha na Banko di Desaroyo di Antia Hulandes (OBNA), minister Camelia-Römer no tin un bista realista riba produkshon lokal.
“E minister ta sali for di e punta di bista ku tin mas o ménos dosshen empresario den agrikultura i krio di bestia, pero den realidat ta 1300. Pasobra e pèrmitnan no ta bini, i pa prevení ladronisia i evitá belasting, hopi kunukero ta keda bou di radar. Pero sigur sigur ta produsí hopi.”
Gobièrnu di Kòrsou no ta sinkronisá e importashon di produkto riba e disponibilidat di tereno di agrikultura., segun Marks. “Kada pais ta inventarisá kuantu tereno e tin disponibel, kuantu agrikultura por proveé den e nesesidat di kuminda, i despues ta importá loke ta nesesario. Kòrsou ta traha nèt kontrali. Ainda gobièrnu mester inventarisá kua tereno ta disponibel i bon pa agrikultura, i kuminsá di emití e terenonan ei.”