Portrèt: Jacqueline Hooftman

WILLEMSTAD – Gobièrnu di Kòrsou ta invertí ‘sigur dies mion florin, asta mas’ den e playa públiko na Mari Pampun. Asina Hugo Clarinda, senior management assistant na Curaçao Tourist Board (CTB) ta bisa. E empresarionan na e pir di Mari Pampun ta wak e desaroyonan ku deskonfiansa.

Fase tres di e proyekto ta enserá ekipashon di un plenchi di hóreka: un terasa grandi ku dos restorant i dos skol di sambuyá. Sea Side Terrace i Surf & Turf mester bandoná nan lugá kant’i laman i drenta den e edifisionan nobo na e plenchi. Skol di sambuyá Twin Divers mester troka su container pa un luga di keda nobo i ta haña konkurensha.

Hür
Na e sitio nobo lo kobra hür serka e empresarionan. Mark Brown di Twin Divers ta na altura kaba di e suma ku e mester bai paga. E doñonan di e restorantnan ta masha disgustá ku di e plannan di gobièrnu, i nan no tin niun intenshon di muda. “Despues di tur loke ku nos a traha ku nos mes forsa desena di aña largu”, un di nan ta bisa.

Mapa di e tereno di deporte di Mari Pampun, e proyekto ku MO ta invertí 3 mion florin aden. Potrèt: CTB

Fase 2 di ‘Marie Pampoen Recreational Park’, e re-ekipashon di e tereno di deporte pegá ku Steenrijk – kaminda tabatin un vèlt di futbòl, un kancha di basketball i un tereno pa ‘bolas krioyas’i ku awor ta traha esakinan di nobo – tampoko no a kai na agrado di tur hende. Fundashon Hubentut den Ambiente Sano, ku 15 aña kaba ta manehá un tereno meskos pa futbòl i bolas krioyas na Steenrijk, ta sinti su mes perhudiká.

No tin sèn
“Tres mion florin? Nos tin añanan largu enbano ta pidi algun mil florin pa un tranké i un bar”, gerente Shirley Adamus ta bisa, ku pa falta di mihó a pone pallet di palu rònt di e vèlt di futbòl. “Asta pa e plan di vakashon pa mucha gobièrnu no tin sèn.”

Bolas Krioyas ta un deporte popular na Kòrsou. Potrèt: Jacqueline Hooftman

Aktualmente na Steenrijk e kampeonato di Federashon Bolas Krioyas ta tuma lugá. “Nos vèlt ta bon bishitá, henter aña tin aktividat i kampeonato”, Adamus, ku a duna pèrmit pa tanten pone e tribunanan di Marie Pampun temporariamente serka Hubentut den Ambiente Sano, ta bisa. “Nos ke yuda gobièrnu, pero laga nan tambe yuda nos anto.””

No tin mantenshon
Organisashon di deporte Sedreko na 1988 a firma pa e mantenshon di e tereno. Adamus ta sakudi kabes. “No a hasi nada den tur e añanan.”

Minister di Enseñansa Marilyn Alcala Walle (PAR), okupá ku asuntunan di deporte, ta bisa ku e no ta na altura di e situashon. E no por bisa nada tampoko di e upgrade di e tereno di deporte na Mari Pampun. “mi no ta envolví direktamente komo ku e proyekto ta sali di desaroyo ekonómiko.”

Riba e bòrchi na Mari Pampun tin pará ku ta ministerio di Desaroyo Ekonómiko ta finansiá e re-ekipashon di e tereno di deporte. Segun Clarinda di CTB, e bùdjèt di tres mion florin ta bini di e servisio di kapital di gobièrnu. “Nos no ta usa nada di e ganashi di impuesto riba volúmen di benta di kamber di hotèl. E suma ei, di ocho pa dies mion pa aña, CBT ta usa pa promoshon i marketing di Kòrsou komo destinashon turístiko.

Renobashon di playanan públiko
Anteriormente CTB a laga sa ku ta bai renobá playanan públiko. E metamorfósis lo mester a kosta un total di ocho mion – un mion pa kada un di e ocho playanan – i lo tabata konsiderablemente mas barata ku e realisashon di Marie Pampoen Recreational Park.